54 vjet burgim për shtatë të akuzuar për krim të organizuar dhe drogë

Gjykata e Mitrovicës ka shpallur aktgjykimin në rastin ku të akuzuar janë 12 persona për krim të organizuar si dhe blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge.
Sipas aktgjykimit të shpallur nga kryetari i trupit gjykues Burim Ademi, të akuzuarit janë dënuar me burg dhe me gjobë.
Muhamet Manxhollit, i akuzuar për veprat penale: pjesëmarrja ose organizimi i grupit kriminal të organizuar; blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge, si dhe për mbajtje në pronësi, kontroll ose posedim të paautorizuar të armëve, Gjykata i ka shqiptuar dënim unik me burgim në kohëzgjatje prej nëntë vitesh dhe dënim me gjobë prej 2,000 euro.
Manxhollit Gjykata i ka shqiptuar edhe dënim plotësues, me të cilin ka konfiskuar automjetin si dhe të gjitha armët.
Me nga 7 vite e gjashtë muaj burgim dhe nga 2,000 euro dënim me gjobë janë dënuar të akuzuarit Hajdin Hoxha, Fehmi Veseli, Avni Mehana, Nehat Haliti, Bajram Rexhepi dhe Ibrahim Miftari.
Ata janë shpallur fajtorë për veprat penale: Pjesëmarrja ose organizimi i grupit kriminal të organizuar dhe blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge.
Menjëherë pas shpalljes se aktgjykimit Gjykata kishte marrë aktvendim të veçantë duke iu caktuar masën e paraburgimit të pandehurve të lartcekur, kurse Hajdin Hoxhës, Bajram Rexhepit dhe Ibrahim Miftarit u ishin konfiskuar automjetet.
Gjyqtari Burim Ademi gjithashtu kishte bërë të ditur se periudha e kaluar në paraburgim, përkatësisht në masën e arrestit shtëpiak, do t’u llogaritet në dënim secilit të akuzuar.
Ndërsa Fehmi Smakiqin, i cili akuzohej se bashku me të lartcekurit për veprat e njëjta penale, Gjykata e ka liruar nga aktakuza për shkak se nuk ka gjetur prova për fajësinë e tij.
Për të akuzuarin Florim Zeneli pas rikualifikimit të veprës penale, Gjykata e ka shpallur fajtor për veprën penale – kultivimi i bimës së hashashit, shkurres së kokainës ose bimëve të kanabisit dhe e ka dënuar në kohëzgjatje prej 1 vit e 6 muaj burgim. Të njëjtit i janë konfiskuar bimët e mbjella të substancave narkotike.
Kurse të akuzuarit Tafil Zeqiri dhe Tahir Tahiri janë shpallur fajtorë e janë dënuar me dënim me kusht për veprën penale – tregtia e ndaluar.
Tafil Zeqirit Gjykata i ka shqiptuar dënim në kohëzgjatje prej një viti burgim, i cili dënim nuk do të ekzekutohet në afat prej dy viteve, ndërsa ndaj të akuzuarit Tahir Tahiri, Gjykata ka shqiptuar dënim në kohëzgjatje prej dy viteve burgim, i cili nuk do të ekzekutohet në afat prej tre viteve.
Për këtë rast gjithashtu janë konfiskuar edhe substancat narkotike në sasi prej 23,277.7 kg.
Muhamet Manxholli, Hajdin Hoxha, Avni Mehana, Nehat Haliti, Fehmi Veseli, Bajram Rexhepi, Florim Zeneli, Fehmi Smakiqi, Jovan Jovanoviq, Ibrahim Miftari, Tafil Zeqiri, Tahir Zeqiri akuzoheshin nga Prokuroria Speciale se kanë kryer veprën penale – pjesëmarrja ose organizimi i grupit kriminal të organizuar.
Gjykata e Mitrovicës e ka shpallur aktgjykimin më 8 janar 2019.
Prokuroria Speciale e Kosovës pretendon se nga dhjetori i vitit 2013 deri në prill të vitit 2014, personat e lartëcekur, duke vepruar si grup i organizuar dhe në bashkëpunim më të dyshuarin Lutfi Peca dhe një person tjetër të quajtur Faik, të dy nga Kukësi i Shqipërisë, kanë poseduar, blerë e shitur substanca narkotike të llojit marihuanë.
Kurse, pas një kontrolli policor të bërë në dhjetor të vitit 2013 në veturën “GOLF 2” pronë e të pandehurit Ibrahim Miftari, i cili njëkohësisht kishte qenë edhe duke e drejtuar atë ishte gjetur dhe sekuestruar substancë narkotike e llojit marihuanë në sasi prej 9 kilogramë e 993,7 gramë.
Sipas akuzës në veturën e të pandehurit Ibrahim Miftari kishte qenë edhe i pandehuri tjetër Nehat Haliti.
Sasinë e narkotikut të gjetur në veturë e kishte blerë Muhamet Manxholli nga i pandehuri tjetër Avni Mehana.
Manxholli ishte zënë në të njëjtën kohë dhe vend me veturën e tij SUZUKI duke përcjellë veturën GOLF II në të cilën edhe kishte qenë i vendosur narkotiku.
Ndërsa në shkurt të vitit 2014, po ashtu gjatë një kontrolle të Policisë së Kosovës në rrugën magjistrale Mitrovicë-Ulqin, në afërsi të fshatit Koshtovë të Mitrovicës, në veturën e të pandehurit Hajdin Hoxha dhe me të kishte qenë edhe i pandehuri tjetër Fehmi Veseli, ishin gjetur dhe sekuestruar narkotikë të llojit marihuanë në sasi 4kg e 0.84gr.
Gjithashtu, sasi e narkotikut të po të njëjtit lloj, por në sasi prej 9kg e 200gr., ishte gjetur edhe pas kontrollit në veturën e të pandehurit Bajram Rexhepi në veri të Mitrovicës.
“Gjithë kjo sasi e narkotikut ishte blerë me qëllim të shitjes nga i dyshuari Lutfi Peca nga Kukësi i Shqipërisë, i cili dyshohet se është organizator dhe udhëheqës i këtij grupi kriminal”, thuhet në aktakuzë.
I pandehuri Muhamet Manxholli gjithashtu në nëntor të vitit 2013 në qytetin e Mitrovicës së bashku me të pandehurin Fehmi Smakiqi kishin marrë nga i pandehuri tjetër në këtë rast Florim Zeneli, një sasi prej 3.5 kilogramë si kundërvlerë të një veture të tipit Audi, të cilën e kishte në shfrytëzim i pandehuri Muhamet Manxholli.
Në këtë rast i akuzuar është edhe Jovan Jovanoviq për të cilin është veçuar procedura nga ana e gjyqtarit të rastit Burim Ademi, pasi që i njëjti kishte munguar disa herë në gjykim dhe nuk ishte arritur të sigurohej prezenca e tij. /Kallxo/

Lini një Përgjigje