Abelard Tahiri: Italia partner kyç i Kosovës në luftë kundër krimit transnacional

0
158

Ministri i Drejtësisë, Abelard Tahiri, dhe homologu i tij italian, Alfonso Bonafede, kanë nënshkruar sot një marrëveshje për Transferimin e Personave të Dënuar në mes të Kosovës dhe Italisë.

Tahiri ka theksuar se marrëveshja e nënshkruar sot e thellon edhe më tej bashkëpunim mes dy vendeve si dhe forcon doktrinën e zbatimit të të drejtave të njeriut në Kosovë, me theks të veçantë të atyre që kanë rënë ndesh me ligjin dhe janë në vuajtje të dënimit, transmeton Klan Kosova.

Gjatë takimit me homologun italian, ministri Tahiri ka shpalosur reformat që janë ndërmarrë në fushën e sektorit të sundimit të ligjit, veçmas kodifikimit të së drejtës penale dhe masave në luftën kundër korrupsionit dhe krimit të organizuar, parandalimit të terrorizmit si dhe trafikimit të narkotikëve.

“Kosova është duke marrë rolin vendimtar si partner kyç në rajon, në luftën kundër krimit të organizuar trans-nacional, terrorizimit, trafikimit të narkotikëve dhe trafikimit me qenie njerëzore. Angazhimi ynë i vazhdueshëm për të fuqizuar sundimin e ligjit në të gjitha komponentët e tij, po i jep Kosovës vendin e saj meritor si shtet që i shërben përpjekjeve ndërkombëtare në parandalimin dhe luftimin e krimit të organizuar trans-nacional”, ka thënë ministri Tahiri.

Ai ka njoftuat homologun italian edhe për politikën e re në fushën e konfiskimit të pasurisë së fituar me vepër penale, si dhe ka kërkuar thellimin e bashkëpunimit në mes dy vendeve përmes shkëmbimit të traditës së mirë të shtetit italian në çështjet e konfiskimit të pasurisë së fituar nga krimi i organizuar dhe korrupsioni.

“Marrëveshja për Transferimin e Personave të Dënuar ka për qëllim vendosjen e drejtësisë dhe rehabilitimit social të personave të dënuar, duke ekzekutuar sanksionet penale në shtetin e vendbanimit të përhershëm të personit të dënuar”.

“Me këtë marrëveshje, krijohet baza ligjore për transferimin e shtetasve kosovar që janë në vuajtje të dënimit në Itali, nga institucionet korrektuese atje, në institucione të ngjashme korrektuese në Kosovë, për të vuajtur pjesën e mbetur të dënimit dhe anasjelltas”.