Problemet në Aleancën Kosova e Re të udhëhequr nga Behgjet Pacolli nuk kanë të ndalur, ku pritet të largohet nga kjo parti nënkryetari dhe kryetari i Mitrovicës, Agim Bahtiri.
Sipas burimeve nga Veriu.info mësohet se kryetari Bahtiri do të jep dorëheqje nga AKR-ja për shkak të pakënaqësive të mëdha në lidhje me qasjen e Behgjet Pacollit ndaj problemeve me të cilat po ballafaqohet Kosova dhe problemeve të brendshme partiake.
Burime nga AKR-ja bëjnë të ditur se Bahtiri nuk ka marrë pjesë në darkën e organizuar sonte në shtëpinë e Pacollit me krerët institucional, edhe pse ka pasur ftesë nga lideri i AKR-së.
Edhe pse merrte pjesë për herë të parë në zgjedhje, AKR-ja në zgjedhjet nacionale të vitit 2007 kishte dalë partia e tretë në Kosovë, duke u parë si alternativë nga qytetarët. Mirëpo, kjo parti ka humbur shumë ndër vite, sa që momentalisht në Kuvendin e Kosovës i ka vetëm dy deputetë, ku madje Labinot Tahiri për shkak të pakënaqësive ka dhënë dorëheqje nga pozita e nënkryetarit dhe anëtarit të Kryesisë./Veriu.info/
