Bali Muharremaj publikon sondazhin e UBO Consulting, i pari është larg nga i dyti!

0
75

Kryetari i Suharekës dhe kandidati edhe për një mandat të ri, Bali Muharremaj, e ka publikuar një sondazh të bërë nga UBO Consulting, kompania që merret me hulumtimin e opinionit publik.

Në bazë të këtij sondazhi, Muharremaj del të jetë fitues pa balotazh që në raundin e parë të zgjedhjeve të 17 tetorit. Në pyetjen e parashtruar se po të mbaheshin zgjedhjet këtë të diel, kë do ta votonit, 66.2 për qind e të anketuarve janë përcaktuar për Muharremajm.

“Jam i lumtur t’ju njoftoj se, sipas hulumtimit më të ri, 75.5 për qind e qytetarëve janë të kënaqur me punën e Komunës së Suharekës për katër vitet që po i lëmë pas, 48 për qind e të cilëve shumë të kënaqur me gjithçka që është bërë deri sot, ndërkohë që 66.2 për qind e qytetarëve e përkrahin kandidaturën time për kryetar në zgjedhjet lokale.

Ky hulumtim është indikator i qartë se jemi fitues të zgjedhjeve të 17 Tetorit.

Po ashtu, këto rezultate janë dëshmi e përkushtimit dhe seriozitetit tonë për punën e bërë.

Tash, shohim kah projektet e katërvjeçarit të ardhshëm, në mënyrë që jo vetëm 75.5%, por të gjithë qytetarët e Suharekës të jenë të kënaqur me punën e Komunës.

Pavarësisht rezultatit, qytetarët dhe përkrahësit tanë nuk do të ndjehen komod, por do të punojnë edhe më shumë, që të mobilizohemi për procesin e ri zgjedhor, duke e prezantuar vizionin e ri qeverisës para qytetarëve të Suharekës.

Hulumtimi është realizuar nga UBO Consulting, një prej kompanive më kredibile në fushën e matjes së opinionit publik, ndërmjet datave 11 dhe 14 shtator.

Mostra përfaqësuese përfshinë 800 të anketuar dhe është realizuar me metodën ballë për ballë të anektimit, me grupmoshat 18+” shkruan Muharremaj në njoftim.