Bizneset paralajmërojnë protesta pas masave të reja antiCOVID

470

Protestat janë rruga e vetme që u ka mbetur bizneseve për të kërkuar miratimin e Ligjit për rimëkëmbje ekonomike, ka thënë kryetari i Odës Ekonomike të Kosovës, Berat Rukiqi.

Kjo deklaratë vjen në ditën kur Qeveria mori vendim për ndalimin e veprimtarive të bizneseve për fundjavë në gjithë vendin.

“Ka presion të jashtëzakonshëm nga bizneset për organizim të protestave dhe formave tjera të kundërshtimeve për stërzgjatjen e miratimit të ligjit për rimëkëmbjen ekonomike dhe vendimet e fundit që lidhen me menaxhimin e pandemisë”, ka shkruar Rukiqi në Facebook duke thënë shtuar se “barrën sociale të pandemisë po e paguajnë bizneset”.

“Gjendja e bizneseve çdo ditë e më shumë po përkeqësohet. Nëse s’ka miratim të ligjit për rimëkëmbjen ekonomike dhe nëse vazhdohen të merren masa për menaxhimin e situatës me pandeminë, pa asnjë konsultë me bizneset, protestat mbesin rruga e vetme për të kërkuar seriozitet institucional në sigurimin e mbijetesës së bizneseve”, ka përfunduar ai.

Sot Qeveria mori vendim që të mbyllë bizneset në gjithë vendin deri të hënën, ndërsa shtatë komuna u futën në karantinë.