Distria Krasniqi do të garojë sot në Antalya të Turqisë, me synim që të forcohet edhe më shumë në pozitën e parë të ranglistës olimpike.
Distria është bartësja e parë në kategorinë deri 48 kilogramë në turneun Grand Prix që prej të premtes deri të dielën mbahet në qytetin bregdetar turk. Ajo është e vetmja që përfaqëson Kosovën në këtë garë.
Në xhiron e parë Distria është e lirë, ndërsa në të dytën e pret fituesen e luftës ndërmjet turkes Gulkader Senturk dhe britanikes Kimberley Renicks. Në kategorinë deri 48 kilogramë garojnë 30 xhudiste.
Distria e ka thuajse të sigurt normën për “Tokio 2020”. Aktualisht është e para në ranglistën olimpike me 2.300 pikë. E dyta është xhudistja e talentuar nga Ukraina, kampionia në fuqi e botës, Daria Bilodid. Në ranglistën botërore Distria është e shtata, por po shkon duke u ngritur vazhdimisht. Ajo është në seri shumë të suksesshme, shkruan Koha Ditore.
