Kryeministri i Kosovës, Ramush Haradinaj ka bërë homazhe dhe ka vendosur kurora me lule te varrezat e dëshmorëve në Gllogjan të Deçanit.
Haradinaj ka thënë se heronjtë dhe dëshmorët janë e vërteta, nderi dhe historia e lavdishme.Kryeministri Haradinaj ka qenë edhe vet luftëtar i UÇK-së dhe komandant i të gjithë atyre dëshmorëve që prehen në kompleksin memorial në Gllogjan.
Në mesin e të rënëve janë edhe tre vëllezërit e tij Shkëlzeni, Luani dhe Enveri.
Bashkë me Haradinajn homazhe kanë bërë edhe përfaqësuesi i familjes së komandantit Adem Jashari, Rifat Jashari dhe presidenti i Kosovës Hashim Thaçi.
Postimi i Haradinajt në profilin e tij në Facebook:
“Heronjtë dhe dëshmorët janë e vërteta, nderi dhe historia jonë e lavdishme. Në kujtim dhe nderim të sakrifices sublime për lirinë e atdheut, homazhe në Kompleksin Memorial “Dëshmorët e Kombit” në Gllogjan, ku prehen përjetësisht djemtë tanë më të zot. Dëshmorët e 24 Marsit, Gazmend Mehmetaj, Himë Haradinaj dhe Agron Mehmetaj do të jenë burim frymëzimi për ta mbrojtur të drejtën tonë, sot, nesër e përgjithmonë. Lavdi të gjithë atyre që luftuan dhe ranë për lirinë e Kosovës”.
