Ibrahimi tregon e cilat janë procedurat që Mitrovica e Veriut të bëhet anëtare e Asociacionit të Komunave

130

Asociacioni i Komunave të Kosovës (AKK) është duke e shqyrtuar kërkesën e kryetarit të Komunës së Mitrovicës së Veriut, Erden Atiq, që kjo komunë të bëhet anëtare e këtij asociacioni.

Në lidhje me këtë kërkesë, kryetari i AKK-së Sazan Ibrahimi, i tha Ekonomia Online se në momentin që e kanë pranuar kërkesën nga kryetari Atiq, po atë ditë kanë dërguar informatat për proceduar që duhet ndjekur kjo komunë për t’u anëtarësuar.

“Ne si Asociacion i Komunave të Kosovës në momentin që e kemi marrë kërkesën nga kryetari Erden Atiq, kryetari i komunës së Mitrovicës Veriore, për mundësinë e anëtarësimit në AKK, po atë ditë e kemi dërguar një informatë te kryetari Atiq ku ia kemi elaboruar në detaje procedurat të cilat duhet të ndiqen nga komuna e Mitrovicës Veriore në mënyrën që të bëhet anëtare e AKK-së”, tha ai.

Ibrahimi sqaroi se kjo komunë për t’u bërë anëtare e AKK-së së pari duhet që Kuvendi Komunal i saj të marrë vendimin për t’u anëtarësuar. Pastaj bëhet shqyrtimi i ligjshmërisë së atij vendimi dhe në hapin radhës është votimi i atij vendimi në Kuvendin e AKK-së.

“Procedura është që fillimisht Kuvendi Komunal i komunës përkatëse duhet të marrë vendim për anëtarësim, për shprehje të gatishmërisë për anëtarësim në AKK dhe pas shqyrtimit të ligjshmërisë të atij vendimi të Kuvendit Komunal atëherë dërgohet në AKK ku pastaj hapi i radhës është që Kuvendi i AKK-së merr vendim për anëtarësim të asaj komune. Pasi që AKK-ja është mekanizëm vullnetar, është organizatë joqeveritare, me vetë faktin që një komunë tregon gatishmëri që të anëtarësohet në mekanizmin tonë është më së i mirëseardhur”, tha ai.

Kryetari i AKK-së ka thënë nëse ndiqen të gjitha këto proceduar dhe kërkesa që parashihen për anëtarësim në AKK, anëtarësimi i Mitrovicës Veriorë në këtë organizatë mund të bëhet shpejt, por sipas tij, së pari duhet që të ketë vendimi nga Kuvendi Komunal i komunës.

“Tani ne e kemi informuar kryetarin Atiq se duhet të merret vendim në Kuvendin Komunal të Mitrovicës Veriore, pastaj ato akte, ato vendime të kuvendeve komunale me legjislacionin në fuqi të dërgohen në Ministrinë e Administrimit të Pushtetit Lokal për shqyrtimin e ligjshmërisë se a janë në harmoni me legjislacionin në fuqi. Pastaj kërkesa, ajo përgjigje kthehet nga MAPL-ja dhe po besojmë që kjo mund të kryhet shpejt, po ne jemi duke besuar dhe pastaj ai vendim i Kuvendi Komunal i cili është i ligjshëm dhe dërgohet në AKK dhe pastaj hapi i fundit është i kuvendit të AKK ku deri më tani nuk ka ndodhur që një anëtarë të mos pranohet”./EO