KQZ: ​Ata që regjistrohen si votues jashtë vendit hiqen nga lista votuese në Kosovë

923

Të gjithë ata që janë regjistruar me sukses si votues jashtë Kosovës do të largohen nga lista e votuesve në Kosovë dhe nuk kanë të drejtë vote.

Zëdhënësi i KQZ’së, Valmir Elezi ka deklaruar se Komisioni Qendror i Zgjedhjeve është duke përpiluar listën e votuesve jashtë Kosovës, listë kjo e cila përmban të dhënat e atyre votuesve.

Të gjithë ata që janë regjistruar si votues jashtë Kosovës emrat e tyre do largohen nga listat e votuesve e cila do shpërndahet me 14 shkurt në vendvotime nëpër Kosovë.

“Komisioni Qendror i Zgjedhjeve duhet të përpilojë listën e votuesve jashtë Kosovës, e cila përmban të dhënat e atyre votuesve që me sukses janë regjistruar si votues jashtë Kosovës dhe duhet që këta emra t’i largojë nga lista votuese, e cila shpërndahet në vendvotime nëpër Kosovë, në ditën e zgjedhjeve më 14 shkurt”, tha Elezi për Kosova Press.

Elezi thekson se në një afat shumë të shkurtër do të dalin edhe me raportin e detajuar për votuesit jashtë vendit.

Sa i përket periudhës së votimit përmes postës, Elezi bën të ditur se do të realizohet në një afat kohor prej 10 ditësh, gjegjësisht nga data 2 shkurt deri më 12 shkurt.