Kurti: E falënderova përzemërsisht mikun e vendit tonë Tony Blair, për mbështetjen e palëkundur

Kryeministri i Kosovës, Albin Kurti, e ka kujtuar thirrjen e kryeministrit të atëhershëm britanik, Tony Blair, më 23 mars të vitit 1999.

Përmes një postimi në Facebook, i pari i qeverisë tha se në atë kohë, ajo thirrje jehoi në parlamentin e Britanisë së Madhe, dhe të nesërmen e 24 marsit 1999, NATO do të fillonte fushatën për ndalimin e spastrimit etnik të shqiptarëve në Kosovë.

“Ne duhet të veprojmë: të shpëtojmë mijëra burra, gra dhe fëmijë të pafajshëm nga katastrofa humanitare, nga vdekja, barbarizmi dhe spastrimi etnik nga një diktaturë brutale; për të shpëtuar stabilitetin e rajonit të Ballkanit, ku e dimë se kaosi mund të përfshijë të gjithë Evropën.” Kjo ishte thirrja e atëherë kryeministrit britanik Tony Blair, më 23 mars 1999, e cila jehoi në Parlamentin e Britanisë së Madhe. Të nesërmen e 24 marsit 1999, NATO do të fillonte fushatën që ndali pikërisht spastrimin etnik të shqiptarëve në Kosovë, fushatë kjo që do të përfundonte më 10 qershor të po atij viti”, shkroi Kurti në Facebook.

Kryeministri e falënderoi Blairin për prezencën e tij sot në Kosovë për nder të 25-vjetorit të Çlirimit të Kosovës.

“25 vjet më pas, ish-kryeministrin britanik Tony Blair, e patëm mysafir në Republikën e Kosovës. Roli dhe kontributi i tij në çlirimin e vendit tonë dhe sigurimin e paqes, bashkë dhe me partnerët e aleatët tanë, mbetet sa i rëndësishëm aq edhe jetik në pavarësinë dhe etapat shtetndërtuese të vendit tonë. Çlirimi dhe liria në Kosovë, solli fundin e luftërave në Ballkan të viteve të ’90-ta, dhe fillimin e një rrugëtimi të demokracisë, progresit dhe zhvillimit. E falënderova përzemërsisht mikun e vendit tonë Tony Blair, për mbështetjen e palëkundur asokohe dhe lidhjen e përjetshme të krijuar mes popullit tonë dhe popullit britanik”, ka shkruar Kurti.

Lini një Përgjigje