Lista Serbe i reagon Sveçlës lidhur me akuzat për Radojçiqin

0
180

Lista Serbe, partia udhëheqëse e serbëve të Kosovës, tha se ministri i Punëve të Brendshme i Kosovës, Xhelal Sveçla, “pa asnjë provë dhe asnjë përgjegjësi… po përpiqet të ndërlidhë nënkryetarin [e Listës Serbe, Millan] Radoiçiq me veprime ilegale”, me synimin “për të trembur pjesën tjetër të popullatës serbe” në Kosovë.

Reagimi i Listës Serbe vjen pasi Sveçla, në një intervistë për Radion Evropa e Lirë më 18 korrik, tha se Radoiçiq “është në krye të strukturave kriminale, përfshirë ato të kontrabandës, të cilat e sulmojnë Policinë e Kosovës” në veri të vendit.

Pjesëtarë të policisë janë sulmuar gjatë fundjavës në veri të Kosovës – për të disatën herë këtë vit – gjatë përpjekjeve për të parandaluar një kontrabandë mallrash.

Sveçla tha se këta persona që sulmojnë zyrtarë të Policisë së Kosovës, janë të njohur për strukturat e sigurisë.

“Janë disa grupe të kontrabandistëve, por të gjitha të koordinuara ngushtë nga institucionet e Serbisë. Do të thotë, lidershpi i Serbisë në vazhdimësi ka shfrytëzuar grupet kriminale për të minuar Kosovën në atë pjesë, e si shpërblim u ka dhënë edhe mundësi për t’u pasuruar, si dhe imunitet pa kufi këtyre individëve. Millan Radoiçiq është njëri ndër krerët e kësaj strukture”, tha Sveçla.

Lista Serbe tha se Sveçla po përpiqet “të përdorë akuza joserioze, të pabaza, për të justifikuar dhunën e papranueshme institucionale, shpërdorimin e pushtetit dhe shtypjen e popullit serb”, e cila “po kryhet për një periudhë të gjatë kohore nga hordhitë e veshura me uniforma, të dërguara nga Prishtina në veri të Kosovës, në luftën kundër biskotave plazma dhe coca-colës”.

Lista Serbe u bëri thirrje përfaqësuesve ndërkombëtarë që “të marrin pozicione të qarta kundër abuzimeve të tilla të autoritetit” nga zyrtarët qeveritarë.

​Millan Radoiçiq është në arrati nga organet e Kosovës për rastin “Brezovica”. Ky rast ka të bëjë me lëshimin e lejeve të kundërligjshme në kompleksin turistik në Brezovicë. Radioiçiq, në këtë rast, dyshohet për “frikësim të dëshmitarëve gjatë procedurës penale”.

Radoiçiq është edhe në listën e zezë të Shteteve të Bashkuara, nën dyshimet se së bashku me biznesmenin nga veriu i Kosovës, Zvonko Veselinoviq, dhe dhjetëra serbë të tjerë, i përkasin një rrjeti të lidhur me krimin e organizuar ndërkombëtar.

Ndaj Radoiçiqit më herët ka pasur edhe një fletarrestim, nën dyshimet se ka qenë i përfshirë në vrasjen e politikanit serb nga veriu i Kosovës, Oliver Ivanoviq. Megjithatë, ai urdhërarrest është tërhequr pa shpjegim në mars të vitit 2021.