MASHT-i akuzohet për manipulim të procesit të vlerësimit të teksteve

0
250

Akuza për manipulim të procesit të vlerësimit të teksteve të reja shkollore kanë drejtuar recensentë dhe autorë shkrimesh ndaj Ministrisë së Arsimit, Shkencës dhe Teknologjisë (MASHT).

Ata thonë se MASHT-i me qëllim të favorizimit të individëve dhe shtëpive të caktuara botuese ka përzgjedhur njerëz joadekuatë në këtë proces, shkruan sot “Koha Ditore”. Kërkesa e tyre është që Ministria t’i bëjë publike të gjitha vlerësimet e teksteve që janë bërë deri tash nga recensentët.

MASHT-i nuk i është përgjigjur gazetës që nga e premtja rreth dyshimeve për manipulim të këtij procesi.

Vlerësimi i teksteve ka nisur nga muaji shkurt në njërin nga hotelet e Durrësit të Shqipërisë. Ministria ka shpenzuar mijëra euro për akomodimin e një numri të madh te personave që kanë qenë të përfshirë në këtë proces.

Në fazën e parë janë vlerësuar tekstet për parashkollorë, për klasat 1, 6 dhe 10, ndërkaq, në fazën e dytë, që ka nisur javë më parë, do të vlerësohen tekstet e klasave 2,7 dhe 11.