Përfaqësuesit e Luginës së Preshevës pohojnë se banorët e Luginës duan të bashkohen me Kosovën

555
Përfaqësuesit e Luginës së Preshevës pohojnë se banorët e Luginës duan të bashkohen me Kosovën, por nuk duan të shkaktojnë ndarje shtesë.
Kryetari i Bujanocit, Shaip Kamberi, ka thënë sot se është e rëndësishme që Kosova të mos ndahet në procesin e dialogut midis Beogradit dhe Prishtinës.
“Jemi të vetëdijshëm për gjendjen në Kosovë, për ndasitë politike që ekzistojnë atje. Nëse Kosova vlerëson se korrigjimi i kufirit do të ishte i dëmshëm, atëherë e jona është që të kërkojmë që Kosova në këto bisedime përfundimisht të marrë edhe një përgjegjësi dhe të ngulë këmbë lidhur me reciprocitetin dhe të drejtat për shqiptarët e Luginës së Preshevës të barabarta me të drejtat që serbët i gëzojnë në Kosovë”, ka thënë Kamberi.
Edhe kryetari i Këshillit Kombëtarë të Shqiptarëve, Ragmi Mustafa, thotë se ata janë të gatshëm të japin kontribut në këtë proces pa ndërhyrë në debat të brendshëm.
“Në Kosovë është hapur debati i cili është pro dhe kundër, megjithatë ne konsiderojmë se nuk duhet të përfshihemi në këtë debat, përderisa jemi duke pritur edhe platformën që do ta prezantojë grupi i dialogut, në kuadër të së cilës ne mendojmë se duhet ta trajtojnë medoemos edhe çështjen e Luginës së Preshevës”, tha ai.