Projekti ndërtimor në afërsi të Liqenit të Badocit nxit kundërshtimin qytetar (video)

0
265
OLYMPUS DIGITAL CAMERA

Prezantimi i këtij projekti me ndërtesa në afërsi të Liqenit të Badocit ka ngjallur reagime të shumta.

Madje, në rrjete sociale, një plan i tillë veçse ka nisur të kundërshtohet e të paralajmërohen edhe protesta në ruajtje të Badocit, njërit ndër burimet kryesore të ujit në Prishtinë.

Por, tërë ky projekt duket se nuk ka leje ndërtimore dhe as që ka aplikuar për një të tillë në Urbanizmin e Komunës së Prishtinës.

“Për leje nuk kanë aplikuar dhe për të marrë një të tillë, duhet pëlqim mjedisor nga Ministria e Mjedisit dhe Planifikimit Hapësinor”, ka thënë kryetari Shpend Ahmeti për KTV-në.

Madje, Ahmeti ka thënë se për shkak se nuk po jep leje në disa vende, tashmë ka marrë edhe kallëzime penale.

Njëri nga arkitektët e këtij projektit “Lakeside Gardens”, Përparim Rama, thotë se projekti ka marrë miratimin e planifikimit dhe se implementimi i tij nuk do ta dëmtojë liqenin.

“…aspektet ambientale të cilat mbrojnë ujërat natyrale janë pjesa kryesore e projektit. Edhe ujërat në lëvizje dhe ato të liqenit janë plotësisht të mbrojtura. Në të njëjtën krijohen shtigje për sporte që krijojnë mundësi të reja për mirëqenien e njeriut, ndërsa e mbrojnë ambientin”, ka shkruar Rama në Facebook, duke u dhënë përgjigje qytetarëve që po kundërshtojnë këtë projekt.

Drejtori i Kompanisë Rajonale të Ujësjellësit “Prishtina”, Ilir Abdullahu, në një përgjigje për KTV-në ka thënë se ndërtimet në atë pjesë mund të ndikojnë që pjesë të Prishtinës të mbesin pa ujë. .

“Secili ndërtim në Veternik e Hajvali e vështirëson më shumë dhe e rëndon Liqenin e Badocit i cili është në rrezik edhe nga ndryshimet klimatike. Secili ndërtim mund të lërë pa ujë banorët e tjerë të Prishtinës. Thatësia e madhe na fut në krizë për ujë, andaj duhet kujdes në planifikim të ndërtimeve”, ka thënë Abdullahu.

Ky projekt i kompanive “KAWA Group” dhe “4M Group”, parasheh ndërtimin e 17 vilave të para deri në verën e vitit 2021.

Përfaqësuesi i KAWA Group, Uran Haxha, ka thënë për KTV-në se ata e kanë pëlqimin e Ministrisë së Mjedisit që nga viti 2016, e që ishte ripërtërirë në vitin 2018.

Sipas tij, projekti parashihet të ndërtohet në pronë private dhe tani kompania do të aplikojë për leje ndërtimi në Komunën e Prishtinës, sipas kushteve të parapara.

Për shkak që ishin ndërtuar afër ujit, MMPH-ja kishte rrënuar më parë disa objekte pranë Liqenit të Batllavës.