Reagon profesori amerikan pas arrestimit të Ikballe Berisha-Huduti

0
405

Ditë më parë, Policia ka arrestuar Ikballe Berisha – Huduti, pasi përmes një deklarate publike doli kundër vrasjes së gjeneralit iranian Qasem Soleimanit, duke kritikuar SHBA-në.

Ikballe Berisha – Huduti kishte shkruar në Facebook se gjenerali i vrarë iranian nuk do të vdesë kurrë, ndërkaq ata që e vranë i kishte quajtur kriminelë.

“Njerëzit si ti nuk vdesin, por te vdekurit qe ecin mbi toke e qe mbajnë gjak kriminalë ata janë te vdekur por vetëm frymojnë për tu turpëruar vet dhe kombin e vet kriminel”, ka shkruar Huduti-Berisha.

Por, për arrestimin e saj ka shkruar profesori amerikan Alon Ben Meir, i cili është edhe njohës i zhvillimeve politike në Ballkan.

Përmes një shkrimi në Facebook, ai ka thënë se “Në qoftë se ajo nuk ka lidhje me organizatat e njohura terroriste, nuk mund të dërgoni njerëz në burg vetëm për shprehje të mendimit”.

Profesori amerikan, ka thënë se Ikballe Berisha Huduti duhet të burgoset vetëm nëse del se është e lidhur me organizatat terroriste.

Ndryshe, Hudutit, i është caktuar masa e paraburgimit me kohëzgjatje prej një muaji.

Lidhur me deklaratat e saj, pati reagime të ndryshme si brenda dhe jashtë vendit.

Arrestimi e saj, përveç se në mediat në Kosovë dhe rajon, është bërë lajm edhe në mediat prestigjioze botërore.

Mediumi britanik kujton faktin se policia tha që ajo ishte arrestuar nën akuzën e “nxitjes për të kryer një vepër terroriste”.

Reuters vë në pah faktin se Huduti shkroi komente në faqen e saj private në Facebook duke kritikuar Uashingtonin pasi forcat amerikane vranë të premten Soleimanin.

Megjithatë, ajo më vonë ka fshirë postimin duke thënë se fjalët e saj janë nxjerrë jashtë kontekstit nga mediat lokale.