Shqipëria mes 4 vendeve që duhet vizituar më 2019

0
87

Janë të shumta agjencitë e huaja dhe mediat prestigjioze që i kanë bërë jehonë Shqipërisë dhe bukurive të saj, duke e rekomanduar si një prej destinacioneve kryesore për 2019

Revista prestigjioze “Who” e rendit Shqipërinë ndër katër destinacionet kryesore për t’u vizituar në Evropë këtë verë, së bashku me Kroacinë, Greqinë dhe rajonin e Puglias në Itali.

“Shqipëria mund të mos jetë një vend shumë i njohur, por pavarësisht kësaj, vendi jashtëzakonisht i bukur i Evropës jugore meriton të njihet si një prej vendeve për t`u vizituar patjetër në 2019”, këshillon revista lexuesit e saj.

“Me çmime më të lira se Greqia dhe Kroacia, Shqipëria ofron peizazhe mahnitëse malesh, plazhe me ujë kristal dhe qytete kala, pa turmat e zakonshme të njerëzve”, vijon më tej përshkrimi i Shqipërisë, transmeton ‘Scan’.

Një vëmendje të veçantë merr Ksamili në Sarandë. “Fshati i vogël i Ksamilit, bashkë me Rivierën shqiptare ofron ndër plazhet më spektakolare në Evropë, ushqim deti me bollëk si dhe janë shumë afër Butrinit dhe Gjirokastrës, dy zona të mbrojtura nga UNESCO”, thuhet mes rreshtave, përcjell albinfo.ch.

“Shqipëria mbetet destinacioni ku mund të ngjitesh nëpër male, të qëndrosh në fshatrat e vegjël të cilët janë jashtë kohës, si dhe të eksplorosh kryeqytetin plot gjallëri, Tiranën, për më pak para se kudo tjetër në Evropë”, mbyllet shkrimi i revistës, duke iu referuar edhe guidës së Lonely Planet për 2019.