Sekretari i përgjithshëm i FFK-së, Eroll Salihu, ka thënë se ndeshja e shtyrë mes Kosovës dhe Maqedonisë së Veriut, e vlefshme për play-offs, do të zhvillohet ashtu siç ishte planifikuar në Shkup dhe ka gjasa që të jetë edhe me shikues.
Kosova është vetëm dy ndeshje larg kualifikimit për Kampionatin Evropian, pasi që është në gjysmëfinale të play-offs kualifikues për këtë garë, që të martën u vendos të shtyhet nga vera e këtij viti në verën e vitit tjetër, raporton Gazeta Express.
Presidenti i UEFA-s, Aleksander Ceferin, i ftoi në takim përfaqësuesit e të gjitha 55 Federatave anëtare, Shoqatës së Klubeve Evropiane, Ligave Evropiane dhe Unionit të Futbollistëve Botërore (FIFPro). Ky takim ishte ftuar ta diskutuar përgjigjen e futbollit ndaj krizës së koronavirusit, që i ka ndalur përkohësisht pothuajse të gjitha garat në Evropë.
Për shkak se Kampionati Evropian u vendos të zhvillohet nga 11 qershori deri më 11 korrik të vitit 2021, e jo në vitin 2020 siç ishte planifikuar fillimisht, edhe ndeshjet e play-offs për këtë garë janë shtyrë.
Kosova ishte e supozuar të luante kundër Maqedonisë së Veriut në gjysmëfinale të play-offs më 26 mars, ndërsa nëse e fitonte këtë përballje në Shkup do të kualifikohej në finalen e madhe të 31 marsit, kur do të luante si mysafire ose kundër Gjeorgjisë, ose kundër Bjellorusisë.
Megjithatë, këto ndeshje tashmë janë shtyrë për në qershor të këtij viti. Por, sekretari i FFK-së tregon se detajet e tjera, përveç datës, planifikohen të mbetet të njëjta – që ndeshja të zhvillohet në Shkup.
“Do të zhvillohet me format të njëjtë, për fat të keq do të luajmë në Shkup. Besoj që do të luhet me shikues, nëse nuk do të ketë ndonjë problem tjetër, edhe pse s’mund ta dimë sigurt se a do të ishte më mirë të luhej me apo pa shikues”, tha Salihu në emisionin sportiv “Favorit”.
