Gjykata Themelore në Prishtinë ka shpallur aktgjykim lirues ndaj Bedri Krasniqit lidhur me akuzën për vrasjen e dy zyrtarëve policorë në vitin 2004 në Podujevë, kurse Alban Dezdari është dënuar me tetë vjet burgim për veprën penale “Ndihmë në kryerjen e veprës penale vrasje”.
Aktgjykimi ndaj dy të akuzuarve është shpallur të mërkurën nga kryetari i trupit gjykues, Arben Hoti.
Sipas aktgjykimit, nuk është provuar se Krasniqi ka kryer veprën penale që i vihej në barrë.
Shpenzimet e procedurës penale bien në barrë të gjykatës.
Kurse Dezdari është shpallur fajtor duke u dënuar me tetë vjet burgim për veprën penale “Ndihmë në kryerjen e veprës penale vrasje”, kurse është liruar nga akuza për “Vrasje të rëndë e mbetur në tentativë”.
Të njëjtit do t’i llogaritet në dënim edhe koha e kaluar në paraburgim.
Ndryshe, të akuzuar në këtë rast për vrasjen e zyrtarëve policorë kishin qenë edhe Bajram Kiqmari dhe Faik Shaqiri, mirëpo Gjykata Supreme në shtator 2017, kishte nxjerrë aktvendim për lirimin e tyre, pasi sipas kësaj gjykate, dy të akuzuarit ishin gjykuar vite më parë rreth kësaj ngjarjeje dhe se ekziston një aktgjykim për pushimin e hetimeve kundër tyre. /BetimipërDrejtësi
