Vetëvrasja është fenomen shqetësues në rritje në shoqërinë tonë. Faktorë rreziku që shtyjnë drejt këtij veprimi shpeshherë mund të jenë gjendja e rënduar psikologjike dhe emocionale, depresioni, ankthi, bipolarizmi, abuzimi me alkool dhe substanca narkotike e gjendja e vështirë ekonomike, raporton Gazeta Sinjali.
Një ngjarje e rëndë ka ndodhur mbrëmë në rrugën ‘Ilaz Kodra’ në Drenas, ku një vajzë e mitur dyshohet se ka tentuar t’i japë fund jetës së saj.
Burimet e Gazetës Sinjali kanë bërë me dije se 16-vjeçarja ka dashur që të hidhet nga lartësia e një objekti i cili është në ndërtim e sipër, por pas intervenimit të njësive policore, e njëjta është shpëtuar dhe është dërguar në Qendrën Kryesore të Mjekësisë Familjare në Drenas.
Pas dhënies së ndihmës së parë, mjekët e QKMF-së e kanë udhëzuar që të vazhdojë trajtimin mjekësor në Qendrën Klinike Universitare të Kosovës.
Nuk dihen ende shkaqet që e kanë shtyrë të miturën të bëjë këtë veprim, mirëpo Policia ka ndërmarrë të gjitha veprimet hetimore që ndihmojnë në zbardhjen e rrethanave të rastit.
Me urdhër të prokurorit, rasti është cilësuar ‘Tentim vetëvrasje’.