Miliona persona në Pekin po jetojnë nën masa kufizimi, mes frikës për një valë të re pandemie pas rishfaqjes së virusit. Autoritetet në kryeqytetin kinez, i cili nuk kishte pasur raste të brendshme për 57 ditë, raportuan 31 raste të reja të mërkurën, duke e çuar totalin në 137 infektime gjatë javës së fundit.
Më shumë se 1200 fluturime u anuluan nga dhe për në qytet ndërsa shërbimet hekurudhore janë reduktuar deri në të paktën 9 korrik.
Po ashtu janë pezulluar shkollat, dhe janë mbyllur gjithashtu pishinat e palestrat. Megjithatë, rrugët vijojnë të jenë të hapura dhe puna vazhdon në kompani e fabrika.
Vatër e shpërthimit të ri besohet të jetë tregu ushqimor i Xinfandi, furnizues i 80 për qind të mishit dhe perimeve në kryeqytet.
Rreth 27 lagje janë klasifikuar si me rrezik të mesëm, ndërsa te njëra që gjendet pranë tregut, rreziku konsiderohet i lartë.
Banorët në zonat me rrezik të mesëm e të lartë nuk mund të largohen nga qyteti, ndërsa ata në zonat me rrezik të ulët mund të largohen, por vetëm nëse do të rezultojnë negative ndaj testit./Opinion.al
