Në Kosovë janë regjistruar edhe 10 raste të reja pozitive me koronavirus pas testimit të 137 mostrave të dyshuara të marra nga Klinika Infektive.
Sipas të dhënave më të reja të Institutit Kombëtar të Shëndetësisë Publike, janë shëruar nga koronavirusi edhe 3 persona, transmeton Fokusi.info.
Rastet pozitive janë të gjitha raste të kontaktit, dy prej tyre në Prishtinë, dy në komunën e Vitisë, përkatësisht në fshatërat Smirë dhe Skifteraj, 1 me vendbanim në Talinovc të Ferizajit, 1 me vendbanim në Hodonovc të Kamenicës, 1 në Burojë të Skenderajit dhe nga 1 rast në Suharekë, Gjakovë e Zveçan.
Deri më sot, në Kosovë janë gjithsej 387 raste pozitive me koronavirus.
Komunikata e plotë e IKPSHPK-së:
TRE TË SHËRUAR DHE DHJETË RASTE ME COVID-19!
Sot më 14 prill 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 137 mostra të marra nga Klinika Infektive, gjurmimi i kontakteve të rasteve në terren si dhe nga karantina në Qendrën studentore.
Me SARS-CoV-2, pozitiv sot janë diagnostikuar gjithsej dhjetë (10) raste.
Rastet pozitive janë raste kontakti, dy (2) raste me vendbanim në Prishtinë, dy (2) raste nga komuna e Vitisë (sipas vendbanimit një (1) rast Smirë dhe një (1) rast Skifteraj) dhe me nga një (1) rast vendbanimet: Talinovc-Ferizaj, Hodonovc-Kamenicë, Burojë-Skenderaj, Suharekë, Gjakovë dhe Zveçan.
Sot më 14 prill 2020, janë shëruar edhe tre (3) pacient, bazuar në rekomandimet e OBSH-së ku dy mostra rezultojnë negative me së paku një ditë distancë kohore. Numri i përgjithshëm i të shëruarve deri më sot është gjithsej gjashtëdhjetë e gjashtë (66).
Nga data 08 shkurt deri më 14 prill 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 3.547 mostra të dyshimta në virusin SARS-CoV-2 dhe prej tyre, pozitive rezultojnë gjithsej treqind e tetëdhjetë e shtatë (387) me 8 raste të vdekjes të cilët kanë pasur sëmundje të tjera shoqëruese.
Në IKSHPK në vazhdimësi përgjatë 24 orëve janë duke u kontaktuar dhe mbikëqyrë të gjitha kontaktet e rasteve, si dhe kontaktet e kontakteve duke iu obliguar për vetëizolim dhe të kërkojnë ndihmë mjekësore nëse kanë simptome. Deri më sot janë kontaktuar dhe janë nën mbikëqyrje 5.153 kontakte të rasteve.
Në nivel global, nga data 31 dhjetor 2019 deri më 14 prill 2020 sipas Worldometers, janë raportuar gjithsej 1.985.135 raste të COVID-19 dhe 125.344 raste të vdekjes.
QËNDRONI NË SHTËPI, KJO UA SHPËTON JETËN!
MBANI DISTANCË FIZIKE PËR SË PAKU 2 METRA!
NA NDIHMONI PAK QË TË JU NDIHMOJMË SHUMË!
Ju faleminderit për mirëkuptim!
