Ambasada e Shteteve të Bashkuara të Amerikës në Kosovë ka kërkuar formimin e shpejtë të Qeverisë së Kosovës, duke uruar për konstituimin e Legjislaturës VII.
Përmes një njoftimi për media, kjo ambasadë ka uruar Glauk Konjufcën për postin e kryeparlamentarit, ndërsa ka thënë se pret që të formohet qeveria për të përmbushur besimin e dhënë nga votuesit.
“Ambasada e Amerikës në Kosovë mirëpret konstituimin e Kuvendit të Kosovës dhe uron kyeparlamentarin Glauk Konjufca e anëtarët tjerë të Kryesisë dhe të gjithë deputetët. Ne inkurajojmë liderët politikë të formojnë menjëherë qeverinë e re që është e vendosur për të përmbushur mandatin e marrë nga votuesit.
Presim të punojmë me qeverinë e re në çështjet e ngutshme që lidhen me paqen, drejtësinë e prosperitetin”, thuhet në njoftim të Ambasadës Amerikane./Fokusi.info/
