Deputetja e Lidhjes Demokratike të Kosovës, Hykmete Bajrami ka reaguar pas deklaratës së kryeministrit Albin Kurti, i cili deklaroi se qarkullimi i bizneseve në 6 muajt e parë të këtij viti ka shënuar rritje prej 30 për qind.
Bajrami ka pohuar se kryeministri sot do të duhej të fliste për shifrat e të infektuarve.
“Kryeministër, Kur fol me shifra duhet me qenë gjithpërfshirës me i paraqitë të gjitha shifrat. Sot, shifrat për të cilët është dashur të flisni janë ato të të infektuarëve dhe strategjia e qeverisë si më dalë nga kjo situatë.
Po e ofendon çdo qytetar me këta numra dhe me këto lëvdata, e më së shumti je duke i ofenduar ata që vitin e kaluar e kanë blerë një litër vaj 99 cent e sot e blejnë 1.55 Euro”, ka pohuar deputetja.
Bajrami ka shkruar se është normale që ka më shumë të hyra këtë vit, pasi që në vitin 2020 ka pasur mbyllje të vendit.
“Normal se ka 34% më shumë se vitin e kaluar të hyra nga tatimi në të ardhurat e korporatave, sepse vitin e kaluar vendi ka qenë i mbyllur e shumica e korporatave nuk kanë pasur mundësi të shesin asnjë produkt nga 11 marsi deri me 5 qershor.
Normal se ka 37% më shumë TVSH të mbledhur se vitin e kaluar, sepse vitin e kaluar vendi ka qenë i mbyllur.
Normal se ka 95% më shumë tatim në pronë të mbledhur këtë vit sepse vitin e kaluar qytetarët për shkak të mbylljes as që kanë pasur mundësi ta paguajnë tatimin në pronë”, thotë Bajrami.
Në reagimin e bërë, Bajrami ka parashtruar edhe disa pyetje për kryeministrin.
Kryeministër, trego:
• Qysh po e shpërndan pakon e ringjalljes 420 milionë euro?
• Qysh ka me u zhvillu mësimi nga data 1 shtator?
• Si ka mundësi që jemi vendi me më se paku të vakcionuar në rajon?
• Kush i ka “meritat” që i kemi mbi 1300 të infektuar në ditë?
• A po shkojmë drejt mbylljes totale?
• Si keni me i ndihmu bizneset e qytetarët kur ta mbyllni vendin?
“Trego për të ardhmen, se në ekonomi krejt çka po ndodhë është meritë e madhe e bizneseve, qytetarëve, konsumit që vjen nga prezenca e mërgimtarëve tonë, masave të rimëkëmbjes ekonomike të qeverisë se kaluar dhe natyrisht inflacionit”.
“Asnjë vendim nuk keni marrë që ndihmon ekonominë, asnjë”, deklaroi ajo.
