E konfirmon Policia, një i vrarë e disa të plagosur në Gadime të Lipjanit

Pak çaste më parë, u raportua për një vrasje në fshatin Gadime të Lipjanit.

Raportimet i konfirmoi edhe zëdhënësi i Policisë së Kosovës për rajonin e Prishtinës, Agron Borovci, i cili në një prononcim dha detaje shtesë, duke thënë se përveç një të vrari, janë edhe disa të plagosur.

E gjithë ngjarja dyshohet të ketë ardhur si pasojë e një mosmarrëveshje.

Rreth orës 22:00, policia ka marrë informatën për një vrasje të ndodhur ne rrugën ” 6 Maji ” në fshatin Gadime në Lipjan.

Menjëherë pas marrjes së informatës policia ka dalë në vendin e ngjarjes duke ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen.

Nga informacionet e para janë ngritur dyshimet se një mosmarrëveshje mes disa personash ka rezultuar me vrasje të një personi, ndërkohë që dyshohet edhe për disa të lënduar.

Policia ka arrestuar një person si të dyshuarin kryesor si dhe ka sekuestruar një armë që dyshohet të jetë arma e përdorur në rast.

Aktualisht po vijon faza fillestare e ndërmarrjes së veprimeve hetimore dhe atyre të ekzaminimit të vendngjarjes në funksion të ndriçimit të plotë të këtij rasti, tha Borovci./Fokusi.info/.