Instituti Kombëtar i Shëndetësisë Publike të Kosovës ka dalur me një reagim për një lajm që është duke qarkulluar në media se është arrestuar një laborant, pasi i ka kërkuar 20 euro një qytetari që ta fus pa radhë për të bërë testin.
IKSHPK ka njoftuar se personi i arrestuar sot nga Policia e Kosovës në ambientet e punës të IKSHPK-ës, në dyshimin për kryerje të veprës penale të korrupsionit, nuk është staf dhe aq me pak laborant i IKSHPK-së.
“Personi i arrestuar ka qenë duke punuar si personel mbështetës në punë administrative me kontratë të përkohshme në tre muajt e fundit me afat të caktuar në IKSHPK i kontraktuar si pjesë e projektit të Bankës Botërore për të përkrahur shëndetësinë e Kosovës në përballje me pandeminë COVID 19.
Pa paragjykuar procesin e hetimeve në këtë rast, IKSHPK ofron mbështetje të plotë zbatimit të ligjit si dhe mbetet si gjithmonë e përkushtuar për të punuar në mënyrën sa më profesionale të mundur”, thuhet në reagimin e IKSHPK.
Ky institucion ka bërë të ditur se ky rast nuk mundet në asnjë mënyrë të zbeh punën kolosale të personelit të IKSHPK në luftimin e pandemisë me COVID-19 gjatë gjithë vitit 2020.
