Kryetari i Lidhjes Demokratike të Kosovës, Isa Mustafa, konsideron se është gabim inicimi i peticionit për shkarkimin e zvëvëndëskryeministrit Driton Selmanaj, teksa u bën thirrje për kujdes deputetëve dhe qeveritarëve që flasin për tema të ndjeshme si ajo e personave të pagjetur.
“Nuk e kam përcjellur debatin në interpelancën për të pagjeturit. Kam lexuar disa shkoqitje nga debati dhe për tensionet e krijuara. Tema e të pagjeturëve do të mbetet gjithmonë aktuale, derisa te gjendet edhe personi i fundit. Mënyra se si artikulohen individët nuk konteston përkushtimin e tyre për të pagjeturit. Çdokush që synon të krijojë kauzë politike nga të pagjeturit duke atakuar individë apo LDK-në, konsideroj se e ka shumë gabim. Gabim e kanë edhe ata që organizojnë peticione. Por si deputetët ashtu edhe qeveritarët duhet të jenë më të kujdesshëm veçmas në temat që janë shumë të ndjeshme”, thotë Mustafa.
Ai tha se atyre që kanë përjetuar tmerre nëse nuk arrijmë t’ua zbusim dhimbjet, duhet t’i respektojmë dhe përkrahim.
“Ka njerëz që kanë përjetuar tmerre. Nëse nuk mund ti ndihmojmë t’ua zbusim dhembjet e tyre, atëherë domosdoshmërisht duhet ti respektojmë dhe ti përkrahim”, tha me tej kreu i LDK-së.
Tutje Mustafa thotë se do të donte debate në Kuvend që zgjidhin probleme e jo që krijojnë probleme.
“Natyra e Kuvendit është të zhvillohen diskutime, të bëhen debate, të flitet. Këtë të drejtë nuk mund t’ua merr askush deputetëve dhe qeveritarëve. Unë kisha dashur të jetë një debat krejtësisht tjetër, një debat që zgjidhë probleme e jo që krijon probleme” u shpreh Mustafa për Express.
