Partia Socialdemokrate këtë të premte kanë mbajtur një aktivitet përpara Qeverisë së Kosovës më rastin e pesë vjetorit të vdekjes së ish aktivistit të Lëvizjes Vetëvendosje, Astrit Dehari.
Frashër Krasniqi, nga kjo parti tha se Astrit Dehari është emri i cili për katër vite rresht nuk e ka hequr prej goje Albin Kurti e Lëvizja Vetëvendosje, teksa akuzoi kreun e qeverisë se emrin e Deharit, Kurti ka filluar ta përdorë vetëm pas vdekjes së tij.
“Astrit Dehari është emër i cili Albin Kurti e ka përmend vetëm pas vdekjes së tij, nuk e ka thënë asnjë fjalë në dy muajt e parë kur ne ishim arrestuar bashkë me Astritin për rastin e padrejtë që ishte zhvilluar ndaj nesh”.
“Astrit Dehari është emri që Albin Kurti vendosi ta përdorë vetëm kur ky emër u bë i përdorshëm elektoralisht e politikisht. Astrit Dehari është emri që Albin Kurti nuk e përmendi asnjëherë prej kur e siguroi pushtetin me 51 përqind”, është shprehur Krasniqi përpara mediave, njofton Klankosova.tv.
Tutje, Krasniqi tha se ka dy vjet që Albin Kurti e Albulena Haxhiu kanë pushtet e ka tetë muaj që këta të dy kanë shumë pushtet, por sipas tij, nuk kanë bërë asnjë veprim në zbardhjen e rastit të Astrit Deharit.
“Kur iu është dashur elektoralisht ky rast, Albin Kurtit iu dokshin shumë tri vite pa drejtësi për Astritin. Ndërsa Albulena Haxhiu thoshte se pesëvjetori i Astritit nuk duhet të na gjejë duke kërkuar ende drejtësi për Astritin”.
“Të kishim qenë sot me një qeveri tjetër, sot do të kishte protesta e akuza nga Vetëvendosje se pse nuk po ka drejtësi për Astritin as pas pesë vitesh”, ka thënë Krasniqi, transmeton Klankosova.tv.
Më tej, Krasniqi tha se sot, Lëvizja Vetëvendosje nuk po kërkon drejtësi për Astrit Deharin, por vetëm po e përkujtojnë atë, teks tha se Kurti e Haxhiu duhet të mbajnë përgjegjësi për, sipas tij, mosveprimin në vënjen e drejtësisë në vend për rastin e Deharit.
“Albin Kurti e Albulena Haxhiu duhet të mbajnë përgjegjësi për mosveprim në vënijen e drejtësisë në vend për rastin e Astritit ose duhet të dalin para opinionit dhe të tregojnë se si i kanë mashtruar qytetarët dhe si kanë manipuluar dhe si e kanë keqpërdorë vdekjen e Astrit Deharit”, është shprehur Krasniqi.
Përveç konferencës, PSD ka vendosur edhe disa fotografi në objektin e Qeverisë së Kosovës me disa nga fjalët që Albin Kurti, Albulena Haxhiu, Glauk Konjufca e Xhelal Sfeçla kanë thënë ndër vite për rastin e Astrit Deharit.
