Kryetari i Ferizajit Agim Aliu, ka shprehur ngushëllime për familjarët e viktimave që humbën jetën tragjikisht në një aksident trafiku, sonte në magjistralen Shtime-Ferizaj.
Ai tha se kanë mbetur të tronditur teksa ka treguar se dy nga viktimat janë nga fshati Dremjak i Ferizajt.
Një nga viktimat ishte punonjës i Drejtorisë së Bujqësisë në këtë komunë.
“Pa fjalë, të tronditur nga aksidenti i sontëm në magjistralen Ferizaj-Shtime, ku humbën jetën 4 bashkëqytetarë, dy prej tyre nga fshati Dremjak i Ferizajt e dy nga Komuna e Shtimes, në mesin e tyre edhe një punonjës i Drejtorisë së Bujqësisë në Komunën e Ferizajt. Në këto momente dhembje e pikëllimi të thellë, jemi me familjet e tyre, për t’i shprehur ngushëllimet më të sinqerta, për humbjen e më të dashurve të tyre në këtë aksident tragjik”, shkroi ai.
Ndëkaq edhe kryetari i Shtimes, Qemajl Aliu ka reaguar pas aksidentit tragjik. Aliu tha se kjo është ditë e kobshme për Shtimën dhe shprehu ngushëllime familjarëve të viktimave.
