Kryeministri i vendit, Albin Kurti, njoftoi se kanë filluar ndërmarrjen e hapave të nevojshëm drejt rritjes së pagës minimale në Kosovë.
Me anë të një postimi në llogarinë e tij në Facebook, Kurti bën të ditur se Ministria e Financave, Punës dhe Transfereve veçse ka përgatitur projektligjin i cili shpejt do të dalë në konsultime publike, dhe se krahas kësaj, në koordinim me Këshillin Ekonomiko-Social, së shpejti do të propozohet edhe niveli i pagës minimale dhe në fund propozimi miratohet në Qeveri dhe kësisoj përmbyllet procesi.
“Për vite të tëra, punëtorët e sektorit privat janë lënë anash. Me qeverisjen tonë, kjo ndryshon. Atyre do t’ua sigurojmë pragun e të hyrave që u mundëson një jetë të dinjitetshme”, shkroi mes tjerash kreu i ekzekutivit kosovar.
