Gjatë Konferencës së Sigurisë në Munih, kryeministri Albin Kurti përveç takimeve të tjera ka pasur edhe një drekë pune me ndërmarrës dhe investitorë të huaj në kuadër të Forumit Angermyer të Politikës dhe Inovacionit.
Kurti në këtë takim ka prezantuar mundësitë dhe potencialin për investime në Kosovë.
Bëhet e ditur se kryeministri Kurti i ka njoftuar pjesëmarrësit me reformat e nisura në drejtësi dhe administratë publike, prioritetet e qeverisë, planet afatgjate, dhe parametrat ekonomikë të vitit 2021, të cilët tregojnë për rritje të eksporteve, investimeve të huaja, qarkullimit vjetor të bizneseve dhe konsumit privat.
Kryeministri ndër të tjera ka përmendur edhe të arriturat e qeverisë së tij si dhe besimin që ka kjo qeveri.
“Besimi në qeveri është i madh dhe kjo është pasqyruar edhe nga përmirësimi rekord vjetor për 17 vende në indeksin e perceptimit të korrupsionit të raportit të Transperancy International. Së fundmi, kemi miratuar ligjin për themelimin e Gjykatës Komerciale, e cila do të jetë në shërbim të rritjes së efikasitetit të trajtimit të konteksteve ekonomike, ndërkaq, që në të njëjtën kohë jemi duke i rishikuar ligjet ekzistuese për Investimet Direkte të Huaja, Investime Strategjike dhe Zonat Ekonomike me qëllim ofrimit të kushteve sa më të favorshme dhe përshtatshme”, ka thënë kryeministri Kurti.
Po ashtu, Kurti i ka ftuar që të investojnë në Kosovë dhe më tej ka shtuar se këta indikatorë dëshmojnë se Kosova paraqet një mjedis biznesor, që do të mund ta bëjë Republikën e Kosovës destinacionin më tërheqës dhe konkurrues në Evropën Juglindore për Investime të Huaja Direkte.
