Eshtrat e katër heronjve të kombit Afrim Zhitia, Fahri Fazliu, Bahri Fazliu dhe Agron Rrahmani u rivarrosen në varrezat e Velanisë në Prishtinë, shkruan Fokusi.info.
Ceremonia e varrimit u bë nën përkujdesjen e Qeverisë së Kosovës dhe për të nderuar veprën e heronjve morën pjesë edhe kryeministri në detyrë, Ramush Haradinaj dhe ish-kryetari i Kuvendit, Kadri Veseli, përfaqësues të institucioneve, të partive politike dhe qytetarë të shumtë.
Për heronjtë nga Llapi u bënë homazhe në hollin e Kuvendit dhe më pas një akademi përkujtimore ku për veprën e bijve të tyre presidenti Hashim Thaçi familjet e tyre i nderoi me “Urdhrin e Lirisë”.
30 vjet më parë në lagjen Bregu i Diellit në Prishtinë ranë heroikisht Afrim Zhitia dhe Fahri Fazliu. Afrimi e Fahriu ranë në altarin e lirisë pas një rezistence disaorëshe ndaj një rrethimi të hekurt të policisë dhe ushtrisë serbo-jugosllave.
Bahri Fazliu dhe Agron Rrahmani ranë heroikisht 21 vjet më parë./Fokusi.info/
