Ministrja e Punëve të Jashtme dhe Diasporës, Donika Gërvalla, e emëruar në këtë post nga kryeministri, Albin Kurti, vite më parë i kishte marrë për bazë akuzat e Dick Marty për trafikim organesh ku akuzohej ish-presidenti, Hashim Thaçi të cilat i kishte shpërndarë në Facebook.
Ministrja Gërvalla-Schwarz, në vitin 2016 kur ish-presidenti Hashim Thaçi, do te votohej për president, ajo kishte shkruar në Facebook’un e saj një porosi për deputetët e LDK’së dhe jo vetëm.
Gërvalla-Schwarz kishte shpërndarë një lajm nga gazeta gjermane ‘BILD’, e cila e lidhte trafikimin e organeve me Hashim Thaçin, pas një raporti nga ish-prokurorit zviceran Dick Marty i cili akuzonte krerët e UÇK’së për trafikim organesh.
Raporti i cili u konsiderua më pastaj si një trillim i Dick Martyt i ndihmuar nga kundërshtarë të shtetit të Kosovës.
Edhe vet Gjykata Speciale e cila u ndërtua mbi këtë raport, në asnjërën nga akuzat e saja nuk trajtohet trafikimi i organeve, ajo çfarë në fakt ishte ndërtuar ky raport.
“Për të gjithë deputetët e Kuvendit të Kosovës, dhe sidomos ata të LDK-së, të cilët kanë ende dilemë se ku e kanë vendin atë ditë që votohet Hashim Thaçi për president”, kishte shkruar Gërvalla-Schwarz, duke bashkangjitur akuzat e Dick Martyt në një artikull të gazetës ‘BILD’, ku shkruante për Hashim Thaçin si person që mendohet të jetë i përzier në tregtinë me organe njerëzore.
Duhet theksuar se këto akuza që shteti serb i promovoj bashkë me kundërshtarët e shtetit të Kosovës, nuk u vërtetuan asnjëherë, dhe as nga Gjykata Speciale që tash është duke i gjykuar krerët e UÇK’së.
Me një kërkim të thjeshtë në Facebook, mund t’i gjeni në profilin e ministres së Punëve të Jashtme, Donika Gërvalla-Schwarz, e cila ka shpërndarë akuzat e Dick Martyt si të mirëqena kundër Hashim Thaçit dhe udhëheqësve të tjerë të UÇK’së.
Postimi i plotë i saj:
“Për të gjithë deputetët e Kuvendit të Kosovës, dhe sidomos ata të LDK-së, të cilët kanë ende dilemë se ku e kanë vendin atë ditë që votohet Hashim Thaçi për president.
Gazeta BILD
Humbësi
12.02.2016
Çfarë historie horrori: Ministri i Jashtëm i Kosovës, Hashim Thaçi (47), mendohet të jetë i përzier në tregtinë me organe njerëzore, raportojnë mediat. Një gjykatë hollandeze do t’i hetojë këto akuza si dhe do të sqarojë, se a është i përzier Thaçi në këtë tregti që nga vitet 90.
BILD mendon: Më e neveritshme nuk ka ku shkon!
Foto: dpa Picture-Alliance”, kishte shkruar atë botë në Facebook’un e saj Donika Gërvalla-Schwarz.