Kryeparlamentarja Vjosa Osmani ka pritur në takim një delegacion të përbërë nga përfaqësues të trembëdhjetë agjencive të Kombeve të Bashkuara të udhëhequr nga Ulrika Richardson, Koordinatore Zhvillimore e OKB-së në Kosovë.
Në këtë takim u diskutua për projekte zhvillimore të cilat përkrahen nga këto agjenci ku Osmani shprehu gatishmërinë e institucioneve të Kosovës për bashkëpunim me këto agjenci.
Temë qendrore e diskutimeve ishte investimi në fushat që janë në funksion të Objektivave të Zhvillimit të Qëndrueshëm, specifikisht në krijimin e parakushteve për barazi në punësim, sigurim të shëndetit të grave shtatzëna dhe të nënave, pastaj të drejtat e punëtorëve, mbrojtje të mjedisit e të tjera.
Osmani theksoi edhe nevojën për rritje të buxhetit në shëndetësi, arsim dhe politika të punësimit.
Palët u pajtuan që ta intensifikojnë bashkëpunimin në mënyrë që të rritet cilësia e punës së Kuvendit të Kosovës nëpërmjet përkrahjes nga këto agjenci.