Ministria e Punëve të Jashtme ka refuzuar të japë informata lidhur me njohjen e paralajmëruar nga ish-ministri i Punëve të Jashtme, Behgjet Pacolli, me arsyetimin se rrjedhja e informacionit e rrezikon seriozisht procesin.
MPJ, përmes një përgjigjeje për Klan Kosova, u ka bërë thirrje të gjithëve të përmbahen nga çdo lloj veprimi që mund t’i cenojë proceset e tilla.
“Nuk japim informacione lidhur me këtë temë. As në rastin konkret, as në raste të ngjashme, ku rrjedhja e informacionit e rrezikon seriozisht procesin. Iu bëjmë thirrje të gjithëve të përmbahen nga çdo lloj veprimi që mund të cenojë proceset e tilla të brishta”, shkruan në përgjigjen e Ministrisë së Punëve të Jashtme dhe Diasporës.
Kryetari i Aleancës Kosova e Re, Behgjet Pacolli, i ka shkruar publikisht, të shtunën, kryeministrit Albin Kurti, duke thënë se presidenti i një shteti është i interesuar të vijë këtë javë në Kosovë për ta zyrtarizuar njohjen e pavarësisë. Ai tha se të shtunën ia ka dërguar Kurtit mesazhin e këtij presidenti në WhatsApp.
“Në WhatsApp, më datën 18/12, ju kam dërguar letrën dhe mesazhin e presidentit të shtetit që konfirmon se janë të gatshëm (javën e ardhshme) ta vizitojnë Kosovën, për të kryer formalitetet e njohjes dhe të diskutojnë për vizitën tuaj në këtë shtet”, shkroi Pacolli në Facebook.
Pacolli tha se për këtë njohje nevojitet vetëm miratimi i kreut të qeverisë.
“Gjithçka është e rregulluar, zotëri kryeministër, unë kam punuar gjatë për këtë njohje dhe pritet vetëm miratimi juaj. Unë, si gjithmonë, jam në dispozicion për gjithçka që keni nevojë rreth kësaj njohjeje”.
