Ministri i Shëndetësisë në Kosovë, Armend Zemaj, ka thënë se gjatë ditës do të bëhen publike vendimet e reja për secilën komunë.
Kjo sipas Zemajt do të bëhet pas publikimit të statistikave nga Institutit Kombëtar i Shëndetësisë Publike të Kosovës (IKSHPK).
“Sot e kemi vlerësimin që bëhet nga IKSHPK-ja. Pas orës 15:00 do të publikohen vendimet e reja për çdo komunë”, tha Zemaj në konferencën për media për punësimin e specialistëve të papunë.
Zemaj ka thënë se nga e marta do të hapet konkursi i specialistëve të papunë në SHSKUK.
“Sot do ta ndajmë lajmin e ri për specialistët e papunë. Kjo është ditë e madhe dhe është lajm i mirë për qytetarët dhe shëndetësinë kosovare. E konfirmojmë se specialistët po punësohen, SHSKUK-ja nga nesër hap konkursin për specialistët e papunë. Nga sot nuk ka më asnjë mjek që do të mbetet në rrugë. Edhe në të ardhmen nuk do të lejoj që asnjë mjek të mbetet i papunë”, ka thënë Zemaj.
“Ky nuk ka qenë vetëm premtim, por zotim i Qeverisë së Kosovës, ne nuk do të ndalemi dhe ministrat paraprakë çështjen e punësimit e kishin peng”.
Ministri i Shëndetësisë Armend Zemaj ka folur edhe për ndërtimin e spitalit COVID-19, i paralajmëruar dy muaj më parë.
“Edhe sot në takim është kërkuar që të shpejtohet dinamika e procedurave, procedura teknike kanë përfunduar dhe procesi duhet të përmbyllët”, ka thënë Zemaj.
Që nga fillimi i pandemisë më 13 mars të këtij viti e deri më 14 nëntor në Kosovë janë infektuar 28.616 persona, prej të cilëve 17.055 janë shëruar, ndërsa 809 kanë vdekur.
Në ditët e fundit ka pasur një rritje të numrit të të infektuarve, duke detyruar autoritetet të vendosin masa kufizimi në lëvizje në disa komuna të vendit. /REL
