Skuadra e Partizanit kujtoi në 80 vjetorin e lindjes futbollistin më të madh shqiptar, Panajot Panon.
Sulmuesi që shkëlqeu me kombëtaren shqiptare dhe me “Demat e Kuq” mblodhi dhjetëra personalitete këtë të dielë nga sporti, politika dhe arti, në një ditë ku u ritheksuan meritat e tij në një kohë të vështirë të kësaj loje, por që nuk ia zbehu shkëlqimin atij që cilësohet nga shumë ekspertë si “Futbollisti i Shekullit”.
Të pranishmit në festën e organizuar nga Partizani hodhën edhe idenë për të konsideruar legjendën Panajot Pano, mes emrave potencialë për stadiumin e ri kombëtar që po përfundon në kryeqytet.
Në vitin 2009, një vit përpara se të ndërronte jetë, presidenti Bamir Topi e dekoroi ish-sulmuesin e njohur me urdhrin e lartë “Nderi i Kombit”. Panajot Pano luajti për ngjyrat e kuqe në vitet 1960-1975./TCH
