Targat KM do të mbeten në përdorim dhe do të mund të zgjatet regjistrimi, por nuk do të lëshohen të reja. Është zgjidhje e përkohshme sepse problemi nuk është zgjidhur, sa i përket targave mbetet çështja e Asociacionit të Komunave me shumicë serbe, pa themelimin e së cilës serbët nuk do të kthehen në institucione, tha i ashtuquajturi kryetar i Komisionit parlamentar për Kosovë në Serbi, Millovan Drecun.
“Borell tha se duhet t’i kthehemi normalizimit të marrëdhënieve, të cilat kuptohet ndryshe në qendrat botërore. Duket se Prishtina në marrëveshje me disa vende qëllimisht ka krijuar problem me tavolinat për të na detyruar të flasim për këtë. Nuk është problem të flasim, por është baza fillestare për të diskutuar për njohjen e shtetit të Kosovës në fillim është e gabuar dhe nuk do të pranohet nga ana jonë”, tha Drecun.
I ashtuquajturi kryetar i Komisionit Parlamentar për Kosovë në Serbi thotë se duhet të shohim veprime, jo vetëm fjalë, kur është fjala për formimin e Asociacionit të Komunave me shumicë serbe.
“Gjermania padyshim ka propozimin dhe pikëpamjen e saj se si duhet të duket. Dallimi është në kompetencat që duhet të ketë Asociacioni. Ne nuk do të pajtohemi që Asociacioni nuk ka rëndësi siç dëshiron Kosova”, thotë Drecun.
Sipas tij, është e rëndësishme që kjo krizë të ndalet nga përshkallëzimi i mëtejmë, sepse tashmë kemi grumbullimin e forcave policore të Kosovës në veri.
“Pala jonë do të duhej të insistonte në tërheqjen e të gjitha forcave speciale parapolicore nga veriu i Kosovës. Pa miratimin e komandantit të KFOR-it dhe kryetarit të katër komunave nga veriu, ata nuk kanë se çfarë të kërkojnë atje. E gjithë kjo krijon një mjedis të rrezikshëm për popullin serb”, tha Drecun.
Duke komentuar rolin e SHBA-së në arritjen e marrëveshjes në tavolina, Drecun thotë se ndikimi i SHBA-së ka qenë gjithmonë vendimtar kur është fjala për Kosovën. Ai beson se problemi më i madh është pozicioni gjerman.
“SHBA-të kanë një qëndrim më fleksibël dhe janë politikisht më racionalë, por kjo nuk do të thotë se do të heqin dorë nga pavarësia e Kosovës, propozimi ynë është dërguar në Bruksel, aty thuhet qartë se nuk do ta pranojmë shtetin të Kosovës dhe se ne nuk do të lejojmë që ajo të pranohet në OKB dhe organizata të tjera ndërkombëtare.Mbetet të shihet se çfarë hapash do të ndërmarrë Borell, paralajmëroi takime të reja me delegacionet e Beogradit dhe Prishtinës.Nëse Kurti vazhdon të insistojë në bisedimet për njohje, do të çojnë në përshkallëzim dhe tensione të mëtejshme”, tha Drecun.
Duke folur për tubimet e djeshme të popullit serb në Kosovë, Drecun tha se ata kanë dërguar një mesazh të qartë se do t’i rezistojnë terrorit të mëtejshëm nga Kosova.
“Protestat kanë peshë të madhe politike dhe as Kosova dhe as bashkësia ndërkombëtare nuk mund t’i injorojë ato. Nuk mund të injorohet se atje është një popull i tërë që është plotësisht i zhveshur dhe i shtypur nga Kosova”, tha Drecun.
