Shefi i grupit parlamentar të AAK-së, Besnik Tahiri, tha se Qeveria dhe kryeministri Albin Kurti, po sillen me papërgjegjësi totale dhe po e injorojnë problemin madhor siç është kriza energjetik me të cilën po përballet aktualisht edhe Kosova.
Sipas Tahirit, Qeveria është dashur të jetë shumë më largpamëse dhe të kontraktojë energji shumë më herët me çmime të arsyeshme të tregut. Ai tha se partia e tij ka më shumë se dy muaj e la ngritur alarmin te Qeveria të adresojmë këtë çështje që është bërë barra më e madhe për qytetarët e Kosovës.
“Sot Qeveria në fakt me qëllim që ta zbeh dhe ta pengoj iniciativën tonë për debat përmbajtjesor, ka sjell në Kuvend një vendim i cili në esencë është dashur të vijë para këtij Kuvendi tash e shumë muaj më parë dhe vendim i cili praktikisht s’ka asnjë ndikim te qytetarët veç se justifikimin e kursit të Qeverisë në raportime te gjitha veprimet me shkëputjen dhe ndaljen e rrymës. Siç jemi në dijeni, Kosova tanimë është duke u përballur me krizën më të rëndë energjetike që nga shpallja e Pavarësisë. Qytetarët e Kosovës, ekonomia, bizneset e mëdha dhe të vogla janë duke u përballur me reduktime shumë të ashpra mu në kohën kur temperaturat kanë rënë në zero, ajo që na bën më të shqetësuar është fakti që Qeveria dhe Kurti i cili po sillet me papërgjegjësi totale po e injoron këtë problem madhor”, tha Tahiri.
Ai ndër të tjerash tha se Kurti e la Kosovën në terr që të fitojë vota më shumë, pasi siç theksoi ai, ka dalë në fushatë për të kërkuar vota për kandidatët e Vetëvendosjes në komuna.
“Është për t’u habitur se si ka mundësi që Qeveria Kurti të harrojnë që tash e 15 vjet në Kosovë nuk ka pasur asnjëherë mungesë të rrymës, ku qytetarët të mbesin pa rrymë jo dy orë siç thuhet por me 6-7 e deri 10 orë në ditë. Kurti duhet të kthej memorien e vet një vit më pas e të bindet si ka qenë Kosova dhe si është në aspektin energjetik. Kjo qeveri është dashur të jetë shumë më largpamëse dhe të kontraktoj energji shumë më herët më çmime të arsyeshme të tregut”.
“Kurti nuk ka pas mundësi që t’i bëjë këto veprime, pasi që me 13 tetor i ka lënë 700 punë anash pa kryer për t’iu dalë në ndihmë kandidatëve për të marrë pushtet në komuna. E len Kosovën në terr që të fitojë vota ma shumë, s’gjeti kohë që me veprime konkrete të parandalojë krizën energjetike. Kërkojmë nga Kurti e Qeveria që të jetë shumë ma serioz në këtë temë, të marrë përgjegjësinë për gjendjen në vend dhe të marrë vendime konkrete për ta stabilizuar gjendjen. Kurti po lyp fajtor e s’po ofron zgjidhje, ai ka qenë dhe VV kundërshtari më i madh i investimeve në sektorin e energjisë”, tha Tahiri.
Sipas tij, Kurti është zotuar që me qeverisjen e tij do të ulë çmimin e rrymës ndërsa sot sipas Tahirit, “Kurti pozita e udhëheqësit të qeverisë, thotë o reduktime o shtrenjtim“.
