Presidenti i Serbisë, Aleksandar Vuçiq është takuar të hënën mbrëma me Miroslav Lajçakun, të dërguarin e posaçëm të BE-së për dialogun Kosovë – Serbi.
Sipas Vuçiqit, Lajçaku mund të garantojë objektivitet dhe paanshmëri në proces.
“Temat për ne janë të dhimbshme, por zgjidhjet me kompromis asnjëherë nuk mund të jenë të lehta për Serbinë”, ka thënë Vuçiq pas takimit, raporton “b92.net”.
Lajçak të hënën pasdite ka arritur në Beograd dhe menjëherë është takuar me Vuçiqin. Fillimisht ka mbajtur një takim vetëm me të, e më pas një takim më të gjerë. Ai javën e kaluar ishte për vizitë në Kosovë.
Sipas “b92.net”, Vuçiq ka thënë se pret vazhdim të dialogut që në korrik. Ai nesër bisedon me Vladimir Putinin, por presidenti i Serbisë shpreson se deri te takimi në Uashington do të ketë një takim edhe me përfaqësuesit e Brukselit.
“Gjithsesi që neve nuk na presin ditë të lehta. Nuk do të ketë pyetje të lehta për Serbinë, por shpresoj se do t’ia dalim të ruajmë interesat tona vitale dhe nacionale”, ka thënë Vuçiq.
Ai i ka thënë Lajçakut se dialogu nuk ka kuptim nëse vetëm njëra palë merr pjesë.
“Ne jemi të hapur për bisedime, por kjo është gjëja që kërkojmë nga ana tjetër, e jo që para çdo takimi të na dërgojnë tabelë me kërkesa që është e pamundur t’i plotësojmë. Dua të falënderoj Lajçakun. Në Serbi është gjithnjë i mirëseardhur”, ka thënë Vuçiq.
Ndërkohë Lajçak ka thënë se rruga e Serbisë për në BE është ngushtë e lidhur me dialogun. Ai ka theksuar se takimi ishte i mirë dhe se është folur për metodologji konkrete dhe për data. Sipas tij BE-ja propozon marrëveshje gjithëpërfshirëse që do të zgjidhë të gjitha çështjet e pazgjidhura.
“Këtu përfshihen çështjet ekonomike dhe regjionale. Kur dialogu të vjen në fund, do të duhej që mos të kishte çështje të hapura”, ka thënë Lajçak.
Koha
