Ambasadori amerikan në Prishtinë, Philip Kosnett ka deklaruar se marrëveshja e Uashingtonit do të mbetet në fuqi deri në ndonjë ndryshim të mundshëm në të ardhmen.
Kosnett ka thënë në RTK se Tony Blinken e konfirmoi para Senatit amerikan se presidenti Biden do të përkrah marrëveshjet e nënshkruar nga administrata Trump.
Ai përmendi marrëveshjen e Uashingtonit duke thënë se do mbetet në fuqi deri në një ndryshim në të ardhmen.
“Javën e kaluar, gjatë seancës dëgjimore për konfirmim para Senatit të SHBA-së, Tony Blinken, i cili është i zgjedhuri i presidentit Biden për postin e sekretarit të Shtetit, tha se ai duartrokit punën që është bërë nga administrata e Trumpit për Kosovën dhe Serbinë. Kjo është në kontekst të përgjigjes së pyetjes që të gjithë po e bëjnë ‘a është marrëveshja e Uashingtonit ende në fuqi? A synon administrata e Bidenit që të vazhdojë punën e bërë nga administrata paraprake?’ dhe përgjigjja në thelb për këto dy pyetje është po, ne e konsiderojmë marrëveshjen e Uashingtonit në fuqi derisa të ketë ndonjë ndryshim të mundshëm që mund të bëhet në të ardhmen dhe pres që do të vazhdojmë të punojmë mbi punën e bërë më herët”, është shprehur diplomati amerikan.
