Kombëtarja e Anglisë ka fituar me rezultat të thellë 4-0 ndaj Ukrainës në çerekfinale të Euro 2020, duke siguruar kualifikimin në gjysmëfinale.
Tre Luanët janë treguar larg më të mirë dhe bindës sesa ukrainasit në takimin e zhvilluar në Olimpico të Romës, ku morën edhe një fitore të madhe.
Pjesa e parë e ndeshjes u karakterizua me lojë më të mirë të Anglisë, ku përveç rasteve të krijuara, arritën të shënojnë edhe një gol.
Goli i vetëm në këtë pjesë erdhi në minutën e katërt dhe ishte Harry Kane, i cili shënoi për 1-0 pas asistimit të Raheem Sterling.
Në pjesën e dytë, ekipi i Gareth Southgate hyri më furishëm dhe ishte shumë më i kompletuar duke shënuar edhe tri gola tjerë.
Dy golat e parë erdhën brenda pesë minutave me anë të Harry Maguire (46’), i cili shënoi me kokë për 2-0, ndërsa Kane (50’) shënoi për 3-0, ku në të dy rastet asistues ishte mbrojtësi Luke Shaw.
Anglia nuk i ndali rastet dhe sulmet me këto dy gola, pasi vazhdoi të krijoi derisa gjeti edhe golin e katërt.
Ishte mesfushori i inkuadruar në pjesën e dytë, Jordan Henderson (63’), i cili shënoi me kokë për 4-0 pas asistimit të Mason Mount.
Pas kësaj fitore, Anglia siguron kalimin në gjysmëfinalen e Euro 2020, ku do të përballet me Danimarkën, e cila mposhti 2-0 Çekinë.
