Kryetari i Kuvendit të Kosovës, Glauk Konjufca, ka komentuar deklaratën e bashkëpartiakut të tij Liburn Aliu për çështjen e bashkimit me Shqipërinë.
Ai tha se integrimi i shqiptarëve nuk mund të ndodhë duke i zhdukur dy shtetet.
“Nuk e di si mund të ndodhë. Është shumë vështirë dhe pak edhe paradoksale ne shekullin 21 me i zhduk dy shtete e me u bë një. Me gjithë këtë rregullim institucional e me gjithë këto çështje”, deklaroi Konjufca për emisionin Rubikon.
“Mendoj që teza e Ukshin Hotit ka qenë plotësisht reale dhe shumë aktuale është sot, kur thotë që ‘hapi më i madh i bashkimit të Shqipërisë me Kosovën do të jetë kur Kosova të bëhet republikë’, kur ta ketë të drejtën e vetëvendosjes, dhe e drejta e vetëvendosjes për Kosovën e çliron kombin shqiptar, e çliron popullin e shtypur të shqiptarëve, dhe kjo pastaj futet në marrëdhënie të lira e të drejtpërdrejta me Republikën e Shqipërisë”, u shpreh Konjufca.
