Presidenti amerikan Joe Biden paralajmëroi se një sulm i ri në aeroportin e Kabulit në Afganistan “ka shumë të ngjarë” të ndodhë “brenda 24-36 orëve të ardhshme“.
“Kjo goditje nuk ishte e fundit,” tha Biden të shtunën pasi SHBA vrau dy anëtarë të grupit të Shtetit Islamik ISIS-K në Afganistan.
Sulmi ajror ishte një hakmarrje pas sulmit të ISIS-K në Kabul të enjten, 25 gusht që vrau 13 pjesëtarë të shërbimit amerikan dhe të paktën 60 afganë.
“Komandantët tanë më informuan se një sulm tjetër ka shumë të ngjarë të ndodhë brenda 24-36 orëve të ardhshme,” tha Presidenti.
Biden tha se ai udhëzoi komandantët e tij “të marrin çdo masë të mundshme” për të siguruar sigurinë e amerikanëve ndërsa SHBA vazhdon tërheqjen e saj nga vendi pas një lufte 20-vjeçare.
Biden iu përgjigj sulmit të së enjtes duke urdhëruar sulmin me dron.
“Unë thashë që ne do të shkojmë pas grupit përgjegjës për sulmin ndaj trupave tona dhe civilëve të pafajshëm në Kabul, dhe ne e bëmë”, tha Biden.
