Ushtruesja e detyrës së presidentit, Vjosa Osmani, ka reaguar ndaj analistit Imer Mushkolaj, pasi ky i fundit veprimet e Osmanit pas marrjes së detyrës se re i quajti “fore të lodhta”.
Ajo me anë të një postimi në Facebook ka publikuar deklaratën që e ka dhënë sot në homazhet në Prekaz, ndërsa para nisjes së citatit, duke iu përgjigjur Mushkolajt ka shkruar: Kjo është një pjesë e deklaratës sime në Prekaz, të cilën disa po e quajnë “Blla blla e pa përmbajtje”.
Postimi i plotë i Vjosa Osmanit në Facebook:
Kjo është një pjesë e deklaratës sime në Prekaz, të cilën disa po e quajnë “Blla blla e pa përmbajtje”. Prandaj edhe jemi këtu si shtet, e para syve të botës po barazohet agresori me viktimën, sepse kur disa prej nesh e ngrisim zërin për krimet e kryera nga Serbia (siç kemi bërë gjithnjë), dikush i quan ‘blla blla’.
“Këtu në Prekaz, ne mund të shohim edhe dëshminë e drejtpërdrejt për krimet kundër njerëzimit dhe gjenocidin që e ka kryer Serbia në Kosovë. Përveç sakrificës së Adem Jasharit dhe pjesëtarëve të tjerë të familjes, 21 anëtarë të familjes që janë vrarë e masakruar këtu janë fëmijë, të moshave të ndryshme, ndërkaq nëse e shohim numrin e përgjithshëm, diku 2/3 e personave të vrarë e të masakruar janë gra, fëmijë e pleq, që edhe tregon për mendësinë gjenocidale dhe mendësinë shfarosëse e cila ka ekzistuar në Serbi, e për të cilën për fat të keq akoma Serbia nuk kërkon falje.”
Lavdi e përjetshme për familjes Jashari.
