Anëtari i Partisë Demokratike të Kosovës, Lirak Çelaj ka thënë se është kundër mbajtjes së zgjedhjeve për kryetar të ri të PDK-së, pasi siç thekson ai, partia e ka një kryetar, që është Kadri Veseli.
Çelaj u shpreh se nuk është kundër kandidatit Memli Krasniqi, por se sipas tij nuk do të duhej të zgjidhej një kryetar i ri, derisa Veseli është kundër vullnetit të tij në Hagë.
Ai u shpreh se kjo po i duket sikur ta braktisnin kreun e partisë.
“E para dua të potencojë se shprehjet e mia që do t’i them nuk kanë të bëjnë me kandidatin, cilido që do të ishte ai. Unë kam kritikuar momentin, mënyrën se si është organizu kjo zgjedhje. E kam theksuar edhe në konventë që unë ndihen së paku, moralisht jo-rehat, që të bëjmë zgjedhje të kryetarit të ri gjatë kohës kur kryetari jonë është në Hagë pa vullnetin e tij dhe e kam përshtypjen sikur po e braktisim”, u shpreh Çelaj.
Ai shtoi se mendon se “është dashur të bëhet një zgjedhje e ndërmjetme, të zgjedhet një kryesi demokratike, me një ushtrues detyre, udhëheqës të përkohshëm me kompetenca të plota të një kryetari, një kryesi e zgjedhur në mënyrë demokratike që do të përfaqësonte unitetin dhe të ecim tutje”, tha ai.
Sipas tij, po dërgohet mesazh në Dhomat e Specializuara, sikur partia e ka braktisur atë dhe mund ta mbajnë për aq kohë sa duan atje.
“Vërejtja ime kryesore është pse po zgjedhim kryetar të ri kur ne e kemi z.Veseli. Sikur po çojmë mesazh në Hagë që ne po e braktisim atë, se mund ta mbani sado atje, s’po e paragjykoj se ai mund të vonojë, mund të dënohet, këtë nuk e kanë bërë as subjektet e tjera politike qoftë në Kosovë, qoftë në rajon në raste të tilla, sepse ne duhet ta mbështesim atë qoftë edhe në mënyrë formale”, u shpreh Çelaj në ATV.
