Policia e Kosovës doli në vendin e ngjarjes.
Mirëpo, ajo nuk hapi rast ndaj askujt për incidentin në shkollën “Ismail Qemali” në Prishtinë, ku pati tentim për sulm gjatë së hënës ndaj kreut të SBASHK-ut, Rrahman Jasharaj.
“Rreth orës 11:30 policia ka pranuar informatën. Pas trajtimit të rrethanave të ngjarjes gjithçka ka mbetur në suazat e mosmarrëveshjes”, theksoi për “Front Online” Agron Borovci nga Drejtoria e Policisë në kryeqytet.
Lidhur me ngjarjen që i ndodhi, ka folur vetë protagonisti Jasharaj.
“Një prind deshi të më sulmojë, ishte tendencioze – mund të sulmohem edhe në rrugë”, ka thënë ai.
Jasharaj insiston se greva nuk do të ndalet.
Nën udhëheqjen e Bashkimit të Sindikatave të Pavarura të Kosovës (BSPK), sistemi arsimor publik në të gjitha nivelet në Kosovë si dhe administratat e institucioneve publike më 25 gusht kanë hyrë në grevë deri në afat të pacaktuar, raporton “Front Online”.
Ata po kërkojnë miratimin në Kuvendin e Kosovës të Ligjit të Pagave, i cili do t’i rregullonte pagat në sektorin publik në bazë të një hierarkie të detyrave, por deri në miratimin e tij, kërkojnë shtesa në pagë prej 100 eurove në muaj.
Qeveria u ka ofruar nga 50 euro shtesë për katër muajt e ardhshëm. Oferta nuk është pranuar. Greva po vazhdon edhe sot, e hënë.