Dhjetë ushtarë rusë të kapur pas një dorëzimi vullnetar tek ushtria ukrainase, u bënë thirrje sot bashkëqytetarëve të tyre që të bëjnë gjithçka është e mundur për t’i dhënë fund luftës në Ukrainë duke kërkuar që Putini të tërhiqet.
“Rusë, bëni gjithçka që është e mundur për t’i dhënë fund kësaj lufte. As Ukraina dhe as Rusia nuk kanë nevojë për këtë luftë. Vetëm Putini ka nevojë,” tha i burgosuri i luftës Andriy Chuvatarevsky në një konferencë shtypi në Interfax-Ukraine të shtunën.
Ai gjithashtu u bëri thirrje bashkëqytetarëve që të shkojnë në mitingje dhe të bllokojnë rrugët me rëndësi federale për të parandaluar kalimin e pajisjeve ruse.
“Përpiquni të informoni presidentin, largoni ushtrinë, zhdukni armatimet e tyre në mënyrë që ata të mos shkojnë dhe të bombardojnë civilët. Nëse dilni në rrugë, presidenti do të vendosë të tërheqë trupat. Atëherë nuk do të ketë luftë,” shtoi ai.
I pyetur nga agjencia Interfax nëse ai i kuptonte motivet e udhëheqjes ruse për të pushtuar Ukrainën, Chuvatarevsky tha jo.
“Nuk e di për çfarë qëllimi. Me shumë mundësi, atij i duhen vetëm territore të tjera. Ne nuk kemi nevojë për këtë”, tha ai, duke theksuar se askush nuk dëshiron të luftojë në ushtrinë ruse.
“Askush nuk dëshiron të luftojë në ushtri. Nuk kisha dëshirë të shkoja. Ndjejmë urrejtje për lidershipin që na dërgoi këtu. E kuptojmë që na hodhën këtu si kotele për të mirën e qeverisë”, tha ai.
Ai gjithashtu u bëri thirrje gazetarëve të huaj në sallë që të shpërndajnë informacionin në mënyrë që presidentët e tyre të mund të ndikojnë tek Putini për t’i dhënë fund luftës. “Ne shpresojmë shumë për këtë,” shtoi Chuvatarevsky.
Sipas një ushtaraku tjetër të kapur, Mikhail Kulikov, qytetarët rusë duhet të bëjnë çdo përpjekje për të ndaluar të rinjtë rusë dhe ukrainas të vuajnë në Ukrainë.
“Popull i Rusisë, ngrihuni! Këtu janë fëmijët tuaj. Këtu po vuajnë edhe fëmijët e popullit ukrainas. Nuk ka pse të keni frikë nga askush. Populli ukrainas nuk ka frikë nga askush. Ata do të ngrihen për tokën e tyre.
Unë kam edhe dy fëmijë të vegjël në shtëpi “Prindër, bllokoni rrugët, mos i lini fëmijët tuaj të shkojnë, bëni gjithçka që trupat ruse të kthehen prapa”, tha Kulikov.
Nga ana tjetër, i burgosuri Dmitry Gagarin i tha familjes dhe miqve të tij në Rusi që të mos dëgjonin propagandën ruse.
“Unë do të doja që të gjithë njerëzit e Federatës Ruse të dëgjojnë se gjithçka në Ukrainë nuk është ashtu siç thuhet në televizionin rus. Nuk ka nazistë këtu. Ka njerëz të zakonshëm paqësorë që tani janë bashkuar kundër një personi – Putinit. Do të doja që të mbaronte sa më shpejt”, tha ai.
“Njerëz, fikni televizorin, mos dëgjoni Putinin, ndaloni të afërmit të vijnë këtu. Kriminelët e vetëm këtu janë ata që erdhën nga Rusia dhe, siç thotë Putin, “mbrojini” ukrainasit. Unë dua që të afërmit tanë të ngrihen dhe tu shpjegojnë situatën njerëzve të tjerë.
Popullsia civile, fëmijët dhe veteranët që së bashku me Rusinë rimorën të gjitha këto toka nga Gjermania naziste po vdesin këtu,” shtoi Gagarin.
Ishin dhjetë ushtarakë që u dorëzuan vullnetarisht dhe dolën në konferencën për shtyp. Secili prej tyre vuri në dukje sjelljen e mirë dhe mundësinë për të kontaktuar të afërmit e tyre.
Disa nga ata që folën deklaruan se kategorikisht nuk duan të kthehen në Rusi, por shtuan se tani kanë frikë për familjet e tyre.
Gjithashtu, sipas tyre, ushtarakët deri në nivel rreshterësh janë informuar vetëm për dërgimin në stërvitje ushtarake. /noa.al
