Këngëtarja me origjinë shqiptare, Rita Ora, i doli në ndihmë familjes Sala nga fshati Pinar i Tiranës pasi tërmeti i 26 nëntorit ia shkatërroi shtëpinë atyre.
Ora vendosi që kësaj familje t’ia rindërtonte shtëpinë dhe sot gjashtë anëtarët e familjes kanë hyrë në shtëpi të sigurt, njofton Klan Kosova.
Çelësat e shtëpisë atyre ua dorëzoi kryebashkiaku i Tiranës, Erion Veliaj, së bashku me një kushërirë të Rita Orës, Amantia.
“Këto ditë kemi qenë me kryeministrin për hapjen e shtëpive të reja që u rindërtuan pas tërmetit, por nuk i bën dot shteti gjithçka. Edhe në Angli, edhe në Amerikë shteti bën aq sa ka takat, por ama secili bën diçka shtesë. Vetëm ideja që Rita ka njëqind koncerte e gjëra, por i vajti mendja dhe tha: Nuk i bëj dot të gjitha, por një shtëpi do ta bëj, një njeri do ta ndihmojmë”, tha ai.
Edlira Sala duke falënderuar kryebashkiakun Veliaj dhe këngëtaren për shtëpinë e re, e emocionuar tha se nuk kishte mundur që të sistemonte fëmijët e saj në një banesë të tillë.
“S’e kisha menduar ndonjëherë në jetën time që një këngëtare do vinte të më bënte shtëpinë këtu. E falënderoj shumë madje, që e bëri këtë për familjen time”.
Veliaj ka publikuar në Facebook këtë aktivitet duke e falënderuar Ritën:
Premtim i dhënë, premtim i mbajtur!?
Në shtëpinë e re të familjes Sala?, e rindërtuar nga goca jonë Rita Ora, e cila iu përgjigj menjëherë thirrjes tonë për të adoptuar një nga banesat e dëmtuara nga tërmeti i 26 nëntorit.?
Faleminderit nga ❤ Rita!