Një 60 vjeçar ka vdekur disa ditë pasi ishte goditur nga vetura.
Rasti ka ndodhur më datë 31 tetor rreth orës 21:54, në magjistralen Shtime – Ferizaj, konkretisht në fshatin Lloshkobare.
Kështu njofton komunikata e lëshuar nga Drejtoria Rajonale e Policisë së Ferizaj.
“Deri te aksidenti dyshohet të ketë ardhur kur automjeti i udhëtarëve i panjohur dhe me shofer të panjohur, ishte duke lëvizur në rrugën magjistrale Shtime-Ferizaj dhe posa arrinë në fshatin Lloshkobare, me pjesën e përparme të automjetit godet këmbësorin me inicilaet N.M (M/K) i moshës 60 vjecar , i cili në atë moment po kalonte rrugën prej anës së majtë në anën e djathtë të rrugës, drejtimi i lëvizjes së automjetit”.
N.M, ka vdekur sot rreth orës 4:30 në Qendren Klinike dhe Universitare të Kosovës.
“Si pasojë e ketij aksidenti të komunikacionit, lëndime të rënda trupore pëson këmbësori 60 vjecar, i cili për ndihmë mjekësore dërgohet në Qendrën Emergjente në Ferizaj, për tu dërguar pastaj për tretman të mëtutjeshëm mjekësorë në Qendrën Klinike Universitare në Prishtinë, ku dhe po trajtohej atje. Ndërsa sot me datën 07.11.2021 në ora 04:30 nga Qendra Klinike Universitare e Prishtinës , jemi njoftuar se këmbësori N.M si pasojë e lëndimeve të rënda në këtë aksident ka ndërruar jetë”.
Me vendim të prokurorit trupi i pajetë dërgohet për obduksion në Institutin e Mjekësisë Ligjore.
Lidhur me rastin Policia e Kosovës ka marrë informacionin se i dyshuari që e ka goditur me veturë tanimë të ndjerin, nuk është ndalur në vendin e ngjarjes.
“Njësia Rajonale e Komunikacionit Rrugor, përkatësisht hetuesit e kësaj njësie nga Drejtoria Rajonale e Policisë në Ferizaj, i kishin marrë të gjitha masat e nevojshme për ta hetuar këtë rast dhe janë në grumbullim të informacioneve në kërkim të drejuesit që nuk është ndalur në vendin e aksidentit, por ka vazhduar në drejtim të panjohur”.
Policia fton qytetarët që nëse kanë ndonjë informacion lidhur me rastin të bashkëpunojnë.
“Me këtë rast, Drejtoria Rajonale e Policisë në Ferizaj fton qytetarët për bashkëpunim në zbardhjen e këtij rasti, që nëse kanë apo sigurojnë ndonjë informacion për automjetin apo shoferin që ka shkaktuar këtë aksident, të njoftojnë menjëherë policinë, stacionin më të afërt, apo përmes aplikacionit digjital ‘’Lajmëro Policinë ‘’ dhe në numrat kujdestarë : 192 ,
0290/326-250
&
0290/322-406
. Të dhënat e juaja do të ruhen në konfidencialitet të plotë”.
