Kryeministri i Republikës, Ramush Haradinaj ka reaguar ndaj një deklarate të Komandantit të Forcës së Sigurisë së Kosovës, Rrahman Rama, i cili foli rreth një letre që Qeveria amerikane ka marrë vendim që të anulojë vizitën e gjeneralit amerikan të Gardës Nacionale të Iowas, Timothy Orr në Kosovë, në shenjë pakënaqësie me vendimin e Qeverisë së Kosovës, për vendosje të taksës në produktet e Serbisë dhe Bosnjë e Hercegovinës.
Haradinaj kërkoi që numri një i FSK-së mos të shfaqet pa nevojë në media.
“Për gjeneralin Rama e kam koleg. Por duhet ta di që është komandant i ushtrisë e jo të bëhet subjekt i mediave. Nëse mendon se është zor me majt ushtrinë, ka sadush të tjerë. Nuk është arsyeshme me dal shpesh në media. Ka zëdhënësi ministria., ushtria dhe komandanti le të punon. Kemi komunikim konfidencial për anulime dhe shpeshtime. E kuptojë pse po bëhet e zhurmshme. Por ju sigurojë se ruajtja e miqësisë duke vepruar kështu janë duke e dëmtuar. Kur dëshironin ta anulominim Specialen e dinim të gjithë që ishte kundër Amerikës. Unë ushtrojë funksionet e mia në bazë të Kushtetutës së vendit”, ka deklaruar ai.
Ndryshe, në letrën e komandantit Rama, thuhet se zyrtarë amerikanë në Kosovë e kanë njoftuar atë se Washingtoni është duke shqyrtuar edhe masa të tjera, përfshirë këtu pezullimin e programeve trajnuese dhe edukative për FSK-në.
Lajmin për anulimin e vizitës së gjeneralit për shkak të taksës e ka konfirmuar edhe Ambasada e Shteteve të Bashkuara në Prishtinë.
“Realisht, nuk është një lajm i mirë. Definitivisht është anuluar vizita e gjeneralit në Kosovë. Orientimi ynë është i qartë dhe bashkëpunimi që e kemi pasur dhe që e kemi deri më tash, pra, falë angazhimit të tyre dhe përkrahjes së tyre, ne jemi këtu ku jemi. Por, nuk besoj që do të vijmë deri në atë masë që këto aktivitetet të anulohen. Është partner i jonë strategjik. Besoj që këto janë vendime politike dhe si pasojë e taksës që është ndaj Serbisë, është marrë ky vendim nga ana e Qeverisë të SHBA-së”, theksoi Rama.
